თურქეთის ლიდერის, რეჯეფ თაიფ ერდოღანის განცხადებით, საპრეზიდენტო არჩევნების არაოფიციალური შედეგები აჩვენებს, რომ მან არჩევნები პირველივე ტურში მოიგო.

სახელმწიფო მედიის ცნობით, იმ ფონზე, როცა ხმების უმეტესი ნაწილი დათვლილია, ერდოღანს 53% აქვს მიღებული, მის მთავარ მეტოქეს მუჰარემ ინჯეს კი 31%. მაგრამ ოპოზიცია საკამათოდ მიიჩნევს ამ მონაცემებს და აცხადებს, რომ ჯერ კიდევ ბევრი ხმა არის დასათვლელი.

BBC-ის ცნობით, ერდოღანმა ასევე განაცხადა, რომ მისმა მმართველმა ალიანსმა, „სამართლიანობის და განვითარების პარტიამ“ პარლამენტში უმრავლესობა მოიპოვა.

პრეზიდენტის გარდა თურქეთი ახალ პარლამენტსაც ირჩევს და ქვეყნის სახელმწიფო მედიის ცნობითვე, ამ დროის მონაცემებით, პრეზიდენტთან ერთად მისი პოლიტიკური ძალა „სამართლიანობის და განვითარების პარტია“ ლიდერობს.

საპარლამენტო არჩევნების ხმების 96% დათვლილია და პრეზიდენტის პარტია 43%-ით ლიდერობს, იტყობინება ახალი ამბების სახელმწიფო სააგენტო „ანადოლუ“. მთავარ ოპოზიციურ ძალას, CHP-ს კი 23% აქვს მიღებული.

საარჩევნო უბნებზე ამომრჩეველთა 87% გამოცხადდა, როგორც ამას სახელმწიფო ტელევიზია იუწყება.

თურქეთში საპრეზიდენტო და საპარლამენტო არჩევნები რამდენიმე საათის წინ დასრულდა. ყველა საარჩევნო უბანი კვირას, ადგილობრივი დროით 17:00 საათზე დაიხურა და ხმების დათვლის პროცესი ჯერაც მიმდინარეობს. სრული პირველადი შედეგები ოდნავ მოგვიანებით გახდება ცნობილი.

საკუთარი არჩევანის დაფიქსირების შემდეგ მოქმედმა პრეზიდენტმა, რეჯეფ თაიფ ერდოღანმა განაცხადა, რომ ამომრჩეველთა მაღალ აქტივობას ჰქონდა ადგილი. მან იმთავითვე გამოხატა იმედი, რომ ხმების 50%-ზე მეტს მიიღებდა, რითაც თავიდან აიცილებდა მეორე ტურს.

„ამ არჩევნებით თურქეთი დემოკრატიული რევოლუციის გზით მიდის“, განაცხადა ერდოღანმა სტამბოლში ხმის მიცემის შემდეგ ჟურნალისტებთან კომენტირებისას.

თურქეთში მიმდინარე საპრეზიდენტო და საპარლამენტო არჩევნებში ამომრჩეველმა უკვე გადაწყვიტა, მისცემს თუ არა კვლავ მანდატს ქვეყნის ამჟამინდელ ლიდერს, რეჯეფ თაიფ ერდოღანს, რომელიც პრემიერ მინისტრის პოსტზე ხანგრძლივად მოღვაწეობის შემდეგ, პრეზიდენტის თანამდებობაზე მეორე ვადით იყრიდა კენჭს, თუმცა პირველადი შედეგები სრულად ჯერ ცნობილი არ არის და ის მოგვიანებით გამოქვეყნდება.

თუკი მმართველი „სამართლიანობის და განვითარების პარტიის“ ლიდერი რიგგარეშე საპრეზიდენტო არჩევნებში მეორე ვადითაც იქნა არჩეული, კრიტიკოსები შიშობენ, რომ ქვეყანაში, სადაც 2016 წლის ივლისის სახელმწიფო გადატრიალების მცდელობის შემდეგ ჯერ კიდევ საგანგებო მდგომარეობაა დაწესებული და სადაც 2017 წლის რეფერენდუმზე პრეზიდენტის ძალაუფლების განმტკიცებას დაუჭირეს მხარი, დემოკრატიული მმართველობა კიდევ უფრო შესუსტდება.

ერდოღანის მთავარი მეტოქე „რესპუბლიკური სახალხო პარტიის“ კანდიდატი მუჰარემ ინჯე იყო..

თურქეთში საპრეზიდენტო არჩევნები წესით, 2019 წლის ნოემბერში უნდა გამართულიყო, მაგრამ ერდოღანმა რიგგარეშე არჩევნების ჩატარების გადაწყვეტილება მიიღო.

ერდოღანმა და მისმა მთავარმა მეტოქემ მუჰარემ ინჯემ შაბათს, საარჩევნო კამპანიის ბოლო დღეს, უზარმაზარი დემონსტრაციები მოაწყვეს და ორთავემ ერთმანეთს თურქეთის მმართველობისთვის შეუფერებელი უწოდა.

„თუკი ერდოღანმა გაიმარჯვა, თქვენი ტელეფონების მოსმენა გაგრძელდება... გაგრძელდება შიშის ქვეშ ცხოვრება... თუკი ინჯე გაიმარჯვებს, სასამართლოები დამოუკიდებელი იქნება“, განაცხადა ინჯემ და დაამატა, რომ იგი თურქეთში საგანგებო მდგომარეობას არჩევიდან 48 საათში გააუქმებს. 

56 მილიონზე მეტი ამომრჩეველი იყო დარეგისტრირებული 180 000 საარჩევნო უბანზე მთელი თურქეთის გასწვრივ. ხმის მიცემა ადგილობრივი დროით დილის 8:00 საათზე დაიწყო და 17:00 საათზე დასრულდა.