საქართველოს პრეზიდენტის, გიორგი მარგველაშვილის განცხადებით, როგორც ქართველი ხალხისთვის, ისე ქვეყნის საერთაშორისო პარტნიორებისთვის გაურკვეველია, რატომ დატოვა პრემიერ მინისტრის პოსტი გიორგი კვირიკაშვილმა.

მარგველაშვილისთვის არადამაჯერებელია კვირიკაშვილის გადადგომის მიზეზად მმართველი პოლიტიკური გუნდის მიერ ეკონომიკური პრობლემების დასახელება იმ ფონზე, როდესაც მაისში ეკონომიკურმა ზრდამ 7.5%-ს მიაღწია.

„შეკითხვები პრემიერის ცვლილებასთან დაკავშირებით პარტნიორებს კი არა, საქართველოს რიგით მოქალაქეებსაც აქვთ. თუ ვინმე ახსნის, რატომ არ აუხსნა არავინ საქართველოს მოქალაქეებს, რატომ წავიდა თანამდებობიდან კვირიკაშვილი, არამარტო ახსნა არ ვიცით, არამედ, ის არ ვიცით, რატომ არ გვიხსნიან. რატომ არ ვართ ღირსი რომ გავიგოთ - გვყავდა პრემიერ მინისტრი, რომელიც რაღაც ისე გამოჩნდა თითქოს ეკონომიკური პრობლემების გამო წავიდა, არადა მაისში თურმე გვქონია იმხელა ეკონომიკური ზრდა, რომელიც საქართველოს აქამდე არ ჰქონია.

რატომ გაქრა პოლიტიკური ველიდან კვირიკაშვილი? შემდეგ რატომ გაქრა პოლიტსაბჭოდან და ფაქტობრივად სახელმძღვანელოებიდან მისი ფოტოს ამოჭრა რატომ ხდება? რა დააშავა ამ ადამიანმა? - ეს კითხვა პარტნიორებს კი არა, ეს კითხვა აქვთ ნებისმიერ ქართულ ოჯახში სადაც შედიხარ.

აღარ გეკითხებიან გვეშველება თუ არა რამე, გეკითხებიან - კვირიკაშვილი რატომ წავიდა? მე პასუხი არ მაქვს და მე ეს კითხვა არაერთხელ დავსვი", განაცხადა საქართველოს პრეზიდენტმა ბრიუსელში ბრიფინგზე.