ჰოლანდიის მიდელბურგის სასამართლომ „ლიბერთი ბანკის“ სამეთვალყურეო საბჭოს თავმჯდომარის, ირაკლი რუხაძის სარჩელის - „ირაკლი რუხაძე მიხეილ სააკაშვილის წინააღმდეგ“ - განხილვა დაიწყო. ქართველი ბანკირი საქართველოს ყოფილ პრეზიდენტს მის მიერ საბანკო მაფიასთან, მათ შორის „ლიბერთი ბანკთან“ დაკავშირებით გაკეთებული საჯარო განცხადებების გამო უჩივის და კომპენსაციას ითხოვს.

მიხეილ სააკაშვილთან ერთად ჰოლანდიაში დღევანდელ სასამართლო პროცესს „ლიბერთი ბანკის“ სამეთვალყურეო საბჭოს თავმჯდომარე ირაკლი რუხაძეც ესწრება.

სააკაშვილი „რუსთავი 2“-თან საუბრისას აღნიშნულ პროცესს პოლიტიკურს უწოდებს და აცხადებს, რომ უფულობის მიუხედავად, ივანიშვილის და მისი საბანკო მაფიის წინააღმდეგ ბრძოლის შეწყვეტას და გაჩუმებას არ აპირებს. იგი ამბობს, რომ ამ მაფიას შეებრძოლება როგორც ჰოლანდიაში, ისე საქართველოში, სადაც „აუცილებლად დაბრუნდება“ და სადაც „აუცილებლად სიმართლე იზეიმებს“.

„მიზანი არის ივანიშვილის და საბანკო მაფიის, რომელიც ძარცვავს საქართველოს და ხალხს, რომელმაც პრაქტიკულად თითოეული ქართული ოჯახის ჯიბეში ჩაყო ხელი, აქედან ამოაქვს უკანასკნელი კაპიკები ხალხის; ხალხს ახრჩობს ვალებში, ხალხს ახრჩობს იმ ვალდებულებებში, რომელიც არც ერთ ცივილიზებულ ქვეყანაში... აი, ჰოლანდიაში წარმოუდგენელია ასეთი რაღაცა, მეზობელ აზერბაიჯანშია წარმოუდგენელი ასეთი რაღაცა, თურქეთშია წარმოუდგენელი; ასეთი რაღაცა მხოლოდ საქართველოში ხდება. საქართველოში ივანიშვილის დროს საბანკო მაფიამ ბოლომდე გაშალა ფრთები და საქართველოს შიგნით ბევრის გაჩუმება შეძლეს, მოსყიდვა და დაშინება შეძლეს და ახლა ხარჯავენ უამრავ ფულს იმაზე, რომ მე გამაჩერონ ჰოლანდიაში - ვერ ეღირსებიან. ესენი არიან ქართველი ხალხის მტრები, ესენი არიან ისინი, ვინც მართლა სისხლს სწოვს საქართველოს და მე შევებრძოლები აქაც, ჰოლანდიურ სასამართლოში, სადაც მათ მიჩივლეს, ასობით ათას დოლარს ხარჯავენ მარტო ამ პროცესების მოწყობაზე და რა თქმა უნდა შევებრძოლები საქართველოში, სადაც აუცილებლად დავბრუნდები და აუცილებლად სიმართლე იზეიმებს. ამათ აქვთ განუზომელი ფული. რა თქმა უნდა, ჩვენ არ გავქვს არც ფული და არც საშუალებები. გარდა იმისა, რომ საქართველოდან არაფერი არ წამომიღია, ესენი მოვიდნენ, გაძარცვეს მთელი საქართველო და ახლა ამ ნაძარცვი ფულის ნაწილს ხარჯავენ იმაზე, რომ მე მითხრან, რომ შენ ხომ მაინც ფული არა გაქვს, შენ ხომ მაინც არ შეგიძლია იურისტებზე დახარჯო, მოდი რაა, გაჩუმდი და ხმა აღარ ამოიღო. ვერ ეღირსებიან. მართლაც ცივი წყალი დალიონ, რომ ეს გავაკეთო. არასოდეს მე ამ ხალხთან ბრძოლას არ შევაჩერებ“, განაცხადა მიხეილ სააკაშვილმა.