ტელეკომპანია „იბერია“ ინფორმაციას ავრცელებს - „ომეგას“ საქმეზე ბრიტანულმა საადვოკატო ფირმამ წერილი სპორტისა და ახალგაზრდობის ყოფილ მინისტრს, ლევან ყიფიანს გაუგზავნა, რომელშიც აღნიშნულია, რომ „ომეგაზე“ განხორციელებული ზეწოლის გამო  საქმე დაწყებულია უელსის უმაღლეს სასამართლოში, ასევე წერილში ნახსენებია ყოფილი და ამჟამინდელი მთავრობის წევრების გვარები.

„ტელეკომპანია „იბერიას“ მიერ მოპოვებული ინფორმაციით, ბრიტანულმა საადვოკატო ფირმამ „ფილდფიშერმა“ წერილი გაუგზავნა საქართველოს სპორტისა და ახალგაზრდობის საქმეთა ყოფილ მინისტრს ლევან ყიფიანს, რომელიც ადრესატს ორი კვირის წინ ჩაბარდა.

წერილში აღნიშნულია, რომ „ომეგას“ დაწყებული აქვს სამართლებრივი პროცედურები ინგლისისა და უელსის უმაღლესი სასამართლოსთვის „ომეგაზე“ განხორციელებული ზეწოლის გამო, რამაც დააზარალა „ომეგა ჯგუფი“.

წერილში აღნიშნულია, რომ საქმე ეხება „ომეგას“ წინააღმდეგ რამდენიმე პირის მიერ უკანონო გზით განხორციელებულ სამართალდარღვევებს. წერილში დასახელებულნი არიან ყოფილი და ამჟამინდელი მთავრობის წევრები, ასევე სხვა მაღალი რანგის პირები“, ნათქვამია „იბერიას“ მიერ გავრცელებულ ინფორმაციაში.