პრეზიდენტობის დამოუკიდებელი კანდიდატი სალომე ზურაბიშვილი, რომელსაც „ქართული ოცნების" მხარდაჭერა აქვს, მიიჩნევს, რომ ეკლესია და სასულიერო პირები „ამ დონეზე" პოლიტიკურ ცხოვრებაში არ უნდა ერეოდნენ.

ზურაბიშვილი, რომლის საწინააღმდეგო მოწოდება ბოლო რამდენიმე დღის განმავლობაში, არაერთმა სასულიერო პირმა გააკეთა, ამბობს, რომ არც ბრალდებები და არც მხარდაჭერა „ეკლესიის ამ დონის ფიგურების" საქმე არ არის.

„არ მესმის, როგორ შეიძლება, რომ ეკლესია ამ დონეზე იღებდეს მონაწილეობას იღებდეს საარჩევნო კამპანიაში და სხვათა შორის, როგორც პრეზიდენტი და როგორც პასუხისმგებელი სახელმწიფოსა და ეკლესიასა შორის კონკორდატის შესრულებაზე, მექნება ძალიან დიდი პროტესტი იმიტომ, რომ ეს არის დარღვევა ყველა იმ შეთანხმების, რაც არსებობს მართლმადიდებელ ეკლესიასა და სახელმწიფოს შორის. პირდაპირი ბრალდებებით ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე და რაშიც არ უნდა ერეოდნენ არც ერთი მხრივ და მეორე მხრივ - არც მხარდაჭერით და არც ლანძღვით", განაცხადა სალომე ზურაბიშვილმა „იმედის" ეთერში.

ბოდბელმა ეპისკოპოსმა, საქართველოს პატრიარქის ქორეპისკოპოსმა, მეუფე იაკობმა სალომე ზურაბიშვილს „კანაფის დედოფალი, ჭყონდიდელმა ეპისკოპოსმა, მეუფე პეტრე ცაავამ კი, „დაფრანგული ქალბატონი დაფრანგული აზროვნებით" უწოდეს.