„ევროპული საქართველოს“ პრეზიდენტობის კანდიდატი აცხადებს, რომ რუსეთის ფედერაციამ, რუსეთ-საქართველოს 2008 წლის აგვისტოს ომთან დაკავშირებით „ქართული ოცნების" მიერ მხარდაჭერილი პრეზიდენტობის კანდიდატის, სალომე ზურაბიშვილის ციტატები მისივე წიგნიდან, ჰააგის სასამართლოში წარადგინა.

დავით ბაქრაძე აცხადებს, რომ ზურაბიშვილის მოსაზრებები ოკუპანტ ქვეყანას გამოყენებული აქვს იმისთვის, რომ ჰააგის სასამართლოში საქართველოს ოკუპაცია და ქართველების ეთნიკური წმენდა გაამართლოს.

„როგორც იცით, საქართველომ შეიტანა ჰააგაში, საერთაშორისო სასამართლოში სარჩელი რუსეთის წინააღმდეგ ეთნიკურ წმენდასთან და ოკუპაციასთან დაკავშირებით და ამ სარჩელთან დაკავშირებით რუსეთმა მოამზადა საპასუხო სარჩელი, შესაგებებელი სარჩელი და რუსეთის საპასუხო სარჩელში ერთ-ერთ არგუმენტად მოყვანილია, სწორედ ციტატები ქალბატონ სალომე ზურაბიშვილის წიგნიდან. ეს არის უკვე მომხდარი და უკვე შემდგარი ფაქტი, რომელიც ადასტურებს, რომ ქალბატონ ზურაბიშვილის მოსაზრებებს და მის ხედვას იყენებს ოკუპანტი იმისთვის, რომ ჰააგის სასამართლოში გაამართლოს საქართველოს ოკუპაცია და გაამართლოს ქართველების ეთნიკური წმენდა. ეს ფაქტი კიდევ ერთხელ ადასტურებს, რომ საზოგადოებამ არ უნდა დაუშვას ქალბატონ სალომე ზურაბიშვილის არჩევა პრეზიდენტად. ვინაიდან ეს ადამიანი უკვე აზიანებს საქართველოს ინტერესს, ხოლო თუ ის იქნება საქართველოს პრეზიდენტი, მის მიერ მიყენებული ზიანი ჩვენი ეროვნული ინტერესებისთვის იქნება განუზომლად უფრო მეტი,“ განაცხადა დავით ბაქრაძემ.