ამერიკის შეერთებული შტატების პრეზიდენტმა დონალდ ტრამპმა განაცხადა, რომ ტერიტორიები, რომელიც „ისლამური სახელმწიფოს“ დაჯგუფებას ჰქონდა დაკავებული სირიასა და ერაყში, „100%-ით“ იქნება გათავისუფლებული არაუგვიანეს მომავალ კვირაში.

„ამის შესახებ გამოცხადებული იქნება, ალბათ მომავალ კვირას, რომ ჩვენ აღებული გვექნება ხალიფატის 100%“, უთხრა მან კოალიციის პარტნიორებს შეკრებაზე.

აშშ-ის სამხედრო და სადაზვერვო ოფიციალური პირები აცხადებენ, რომ კონტრ-ტერორისტული ქმედებებისა და ზეწოლის გარეშე „ისლამურმა სახელმწიფომ“ შესაძლოა კვლავ აღიდგინოს თავისი პოზიციები რეგიონში.

ტრამპის მიერ დეკემბერში გაკეთებულმა განცხადებამ, რომ „ისლამური სახელმწიფოს“ დაჯგუფება დამარცხებული იყო და მას სურდა, რომ 30 დღის განმავლობაში სირიიდან ამერიკული ჯარები გამოეყვანა, კოალიციის მოკავშირეები შოკში ჩააგდო.

თუმცა თავდაცვის მდივნის ჯეიმს მატისის და თავდაცვის დეპარტამენტის სხვა მაღალი რანგის თანამდებობის პირების გადადგომამ და „რესპუბლიკელების“ და საზღვარგარეთელი მოკავშირეების კრიტიკამ აიძულა ტრამპი ჯარების გამოყვანის პროცესი შეენელებინა.

„მათი მიწა აღარ არსებობს“, განაცხადა ტრამპმა ვაშინგტონში კონფერენციაზე. „ისლამური სახელმწიფოს ხალიფატი განადგურებულია“.

მაგრამ, განაგრძო პრეზიდენტმა, დაჯგუფებას ჯერ კიდევ აქვს „ძალზე მცირე სექციები, რომელიც შესაძლოა რომ დიდად სახიფათო იყოს“.

მან ასევე ყურადღება გაამახვილა „ისლამური სახელმწიფოს“ პროპაგანდის მანქანაზეც, რომელიც მებრძოლების ევროპიდან და სხვა რეგიონებიდან გაწვევას ახდენდა.

„გარკვეული დროის პერიოდში ისინი იყენებდნენ ინტერნეტს უკეთესად, ვიდრე ჩვენ. ისინი იყენებდნენ ინტერნეტს ბრწყინვალედ, მაგრამ ახლა ეს ასე ბრწყნვალედ აღარ გამოსდით“, თქვა მან.

ტრამპმა მადლობა გადაუხადა კოალიციის პარტნიორებს: „ჩვენ მომავალი მრავალი წლის განმავლობაშიც ერთად ვიმუშავებთ“.

სახელმწიფო მდივანმა მაიკ პომპეომ პირობა დადო, რომ შეერთებული შტატები, სირიიდან ჯარების გამოყვანის მუხედავად, განაგრძობს „ისლამურ სახელმწიფოსთან“ ბრძოლას.

მან ჯარების გამოყვანას „ტაქტიკური ცვლილება და არა მისიაში ცვლილება“ უწოდა და აღნიშნა, რომ მსოფლიო „დეცენტრალიზებული ჯიჰადის ეპოქაში“ შედის.