მომღერალი გია გაჩეჩილაძე (უცნობი) აცხადებს, რომ ბიძინა ივანიშვილს „თავისი ჩამოყალიბებული აზრი აქვს ყველაფერზე“ და ყველა გადაწყვეტილებას ისე იღებს, როგორც „თვითონ ჰგონია რომ არის მართალი“.

როგორც მან ტელეკომპანია „TV პირველის“ ეთერში განაცხადა, საჭიროა პოლიტიკურ ცხოვრებაში კარდინალური ცვლილებები და ახალი სისხლი, პოლიტიკაში სრულიად უცხო, ახალგაზრდა ადამიანების მოსვლა და ორივე პოლიტიკურ ძალას, როგორც „ქართულ ოცნებას“, ისე „ერთიან ნაციონალურ მოძრაობას“ და მათ ლიდერებს, ბიძინა ივანიშვილს და მიხეილ სააკაშვილს უარი უნდა ეთქვას.

„ეს უნდა იცოდეთ ხასიათი და უნდა იცნობდეთ ადამიანს, რომ მიგახვედროთ, როგორ იმართება ეს ქვეყანა. [ივანიშვილს] თავისი ჩამოყალიბებული აზრი აქვს ყველაფერზე. კიი, მოგისმენს, ყველაფერს გააკეთებს, მაგრამ მაინც გადაწყვიტავს ისე, როგორც თვითონ ჰგონია რომ არის მართალი. მაინტერესებს, ერთხელ მაინც თუ დაფიქრებულა იმაზე, რომ იქნება მე ვცდები. მე ყოველ შემთხვევაში არ მგონია.

„რაღაც უნდა მოხდეს 2020-ამდე, თორემ რაღაც შარს ყველანი შეიძლება ერთად გადავეყაროთ... საპრეზიდენტო არჩევნებმა დაგვანახა კარგად, რომ რაღაც თუ არ შეიცვალა, საზოგადოებამაც შევპირდით ხალხს მეორე ტურის წინ, რომ ასე აღარ დარჩებოდა, როგორც იყო და რაღაცა უნდა შეცვლილიყო და მაშინ იქ გაკეთდა ისეთი განცხადებები, რომ ჩვენ ვართ ამის პასუხისმგებლები ოღონდ თქვენ მეორე ტურში არ დაუშვათ ის ამბავი, რომ რაღაც წარსული დაბრუნდეს, თუმცა არაფერი არ შეიცვალა და ამის ნიშანი იყო სასამართლოს თემა. იგივე როდემდე შეიძლება, არ ვიცი“, განაცხადა გია გაჩეჩილაძემ, რომელიც საკუთარ თავს პოეტ დავით მაღრაძის გვერდით მოიაზრებს.

მაღრაძემ უკვე ბიძინა ივანიშვილისგან გამიჯვნის თაობაზე განაცხადა და თქვა, რომ „დაიცავი საქართველოს“ სახელით საზოგადოებრივ მოძრაობას ჩაუდგება სათავეში.