„რუსთავი 2“ ყოველთვის იყო ჩემი და ხალვაში იყო ნომინალური ფიგურა, ხელის ბიჭი და ფიგარო, გასაქცევად აქეთ-იქით“, განაცხადა თბილისის შოთა რუსთაველის სახელობის საერთაშორისო აეროპორტში, საქართველოში დაბრუნებულმა „გამარჯვებული საქართველოს“ დამფუძნებელმა და სააკაშვილის პრეზიდენტობისას შინაგან საქმეთა და თავდაცვის მინისტრმა, ყოფილმა გენერალურმა პროკურორმა, ირაკლი ოქრუაშვილმა.

მან თქვა, რომ შაბათს შეხვდება „რუსთავი 2“-ის 10-ამდე ჟურნალისტს და სამაუწყებლო კომპანიის 80%-ს უსასყიდლოდ გადასცემს, რათა „მათ გააგრძელონ დავა „რუსთავი 2“-ის კანონიერებაზე“.

„ივანიშვილს ტყუილად მიაჩნია, რომ ჩვენი ქვეყანა არის ჩალით დახურული. ის „რუსთავი 2“-ის წაღებით თავის მდგომარეობას ვერ გაიუმჯობესებს და მით უმეტეს „რუსთავი 2“-ს სრულყოფილად ვერ წაიღებს. მე ვაპირებ ხვალ შევხვდე რამდენიმე ჟურნალისტს, 10-ამდე ჟურნალისტს და ჩემი მოთხოვნის, იმ კანონიერი მოთხოვნის, რომელიც სასამართლოში წარვადგინე, 80%, პირობითად ციფრებში გამოხატული, გადავცე მათ უსასყიდლოდ - იმისთვის, რომ მათ გააგრძელონ დავა „რუსთავი 2“-ის კანონიერებაზე. ამ ჟურნალისტების ვინაობას, სათითაოდ სუყველას, ჩამოგითვლით ხვალ“, განაცხადა ოქრუაშვილმა ჟურნალისტებთან საუბრისას.

ოქრუაშვილი ამბობს, რომ მას ქიბარ ხალვაშის მიერ ხელმოწერილი უტყუარი დოკუმენტი გააჩნია, რომლის მიხედვითაც ხალვაშს მისი ვალი აქვს, რომელსაც არ აბრუნებს.

„ამ დოკუმენტის მიხედვით, საქალაქო სასამართლოში ვდაობ უკვე მესამე წელია ფინანსურ ნაწილზე. მას ვალი აქვს ჩემი და არ აბრუნებს. 8 თვეა ხალვაში არ ცხადდება სამხარაულის ექსპერტიზაში - სადაც დოკუმენტი სასამართლომ გააგზავნა 8 თვის წინ - ხელმოწერის ნიმუშის დასატოვებლად და არ ცხადდება ერთი მარტივი მიზეზის გამო, ეს ხელმოწერა ეკუთვნის მას და ის ამას ვერ გაექცევა, რაც უნდა მოიგონოს. ხალვაშის გამოუცხადებლობის გამო ექსპერტიზა ვერ შედგა. ჩემგან რას ელოდებით? სამი ექსპერტიზის დასკვნა მაქვს მიტანილი დამატებით. მათ მოითხოვეს ექსპერტიზა, მივუტანე ორიგინალი; გააგზავნეს ორიგინალი სამხარაულის ბიუროში, არ მიდის ხალვაში“, აცხადებს ოქრუაშვილი.