„რაც საქართველოში ხდება - კბილის ექიმი მინისტრი, პირადი მცველი მინისტრი, გულის ექიმი მინისტრი, შენი პირადი ბანკირები პრემიერ მინისტრები - ეს სადმე ხდება?!“ - განაცხადა ტელეკომპანია „კავკასიას“ გადაცემა „სპექტრში“, ჟურნალისტ დავით აქუბარდიასთან სტუმრობისას ადვოკატმა ზაზა ხატიაშვილმა.

„ახლა მაგარ რამეს მოგიყვები. სტრასბურგში ვარ, წულუკიანი დაიბლოკა, ევა გოცირიძე და სამი მოსამართლე ჩავარდა, შეხვედრაზე ვიყავი, იქ მეორე განყოფილებაა, ერთი-ორი ჭიქა დავლიეთ და ერთი მეუბნება - ძალიან მაღალი თანამდებობის პირია, მე არ ვარ ის კაცი, რომ სახელი და გვარი დავასახელო - სანამო თავის მძღოლს ტრანსპორტის მინისტრად არ დაგინიშნავთო ეს კაცი და ჰოდა, როგორ შემრცხვა იცით? მე მეგონა არაფერი არ იცოდნენ, თურმე იმათ რომ იციან, მე იმდენი რა ვიცი. ანუ, ინფორმაცია არის გასული, რომ საქართველოს მართავს ადამიანი, რომელიც ტრანსპორტის მინისტრის თანამდებობა რომ იყოს, დანიშნავს თავის მძღოლს იმიტომ, რომ თავისი პირადი მცველებით აკომპლექტებს სახელმწიფო ხელისუფლების უმაღლეს თანამდებობებს, დასცინიან დათო, იცი, როგორ დასცინიან?“ - განაცხადა ზაზა ხატიაშვილმა.

ადვოკატმა აღნიშნა, რომ აშშ-ის კონგრესიდან საქართველოში გამოგზავნილი წერილები ბიძინა ივანიშვილისთვის საბრალდებო დასკვნაა და ეს მშვენივრად იცის ივანიშვილის უცხოეთში მცხოვრებმა „ძალიან ჭკვიანმა“ შვილმა.

„ჩაუშესკუმ (რუმინეთის მოკლული ლიდერი) 4 დღით ადრე თათბირი ჩაატარა სანამ ჩაქოლავდნენ და თქვა, რომ ჩემს შემდეგ ეს იქნება პირველი პირი, ეს იქნება შინაგან საქმეთა მინისტრი, ეს იქნება უშიშროების მინისტრი, ყველა დიქტატორი... ამას ჰყავს ძალიან ჭკვიანი შვილები, ბიძინას. ერთი შვილი ჰყავს ძალიან ჭკვიანი, უცხოეთში, ძალიან სერიოზული განათლება მიიღო. იმან მაინც ხომ იცის, რას ნიშნავს ეს კონგრესმენების წერილები. თუ სხვას არ უსმენს, შვილს ხომ მაინც უნდა მოუსმინოს. იმან ხომ იცის, რომ ეს არის საბრალდებო დასკვნა. ხომ უნდა უთხრას, რომ ქვეყანა იღუპება. ხომ თქვა, რომ ჩემმა შვილებმა მთხოვესო, ქვეყანა იღუპება და პოლიტიკაში შემოდიო. ახლა უნდა უთხრან, რომ ქვეყანა იღუპება“, განაცხადა ზაზა ხატიაშვილმა.