აი, ეს არის ჩემი ბათუმი, – ამის შესახებ საქართველოს ყოფილმა პრეზიდენტმა, მიხეილ სააკაშვილმა ფეისბუქ გვერდზე გავრცელებულ ვიდეოში განაცხადა და მოუწოდა თავის მხარდამჭერებს 3 ოქტომბერს თბილისში, თავისუფლების მოედანი გაავსონ.

„აი, ეს არის ჩემი ბათუმი. 2-ში უნდა მივიდეთ ყველა არჩევნებზე, მივცეთ ხმა „ნაციონალურ მოძრაობას“ და არავითარ შემთხვევაში არც არც ივანიშვილს, არც გახარიას, არც ვიღაც მათ სატელიტებს. თუ ნაციონალური მოძრაობა არ მოგწონთ, მიეცით შედარებით პატიოსან პატარა პარტიებს. აქ უნდა ყოფილყო ჩემი ბათუმის ამერიკული ტექნოლოგიური უნივერსიტეტი, რომელიც გაანადგურეს. დღეს ვაქცინაც გვექნებოდა, არც კოვიდი დაგვემართებოდა და არ დაიხოცებოდა ამდენი ხალხი. ისე მენატრებოდა აქაურობა. დღეს არის ჩემი ოცნების ასრულება, მაგრამ საბოლოოდ ეს აღსრულდება, როდესაც საქართველო დადგება ფეხზე. დღეს აქ მხოლოდ სახლებს აშენებენ რუსებისთვის და სადაც ეს არის, იქ არსად არ არის განვითარება და წინსვლა“, - განაცხადა მიხეილ სააკაშვილმა და დაამატა:

"ჩვენ ყველანი უნდა მივიდეთ ორში. ყველამ მივცეთ ხმა, ყველამ, შემდეგ 3-ში რუსთაველი გავავსოთ, თავისუფლების მოედანი და თუ ვიქნებით 100 ათასი ადამიანი, ჩვენ ვერავინ ვერ დაგვამარცხებს".