GUARDIAN.GE - ბორის ჯონსონმა დაუნინგ სტრიტზე „კონსერვატიული პარტიის“ ლიდერის თანამდებობიდან წასვლის შესახებ გამოაცხადა, მაგრამ აღნიშნა, რომ იგი პრემიერ-მინისტრის პოსტზე „ტორების“ ახალი ლიდერის არჩევნების ჩატარებამდე დარჩება.

მან აღნიშნა, რომ პოლიტიკაში „შეუნაცვლებელი არავინ არის“. მისი თქმით, „ჩვენი ბრწყინვალე და დარვინისტული სისტემა სხვა ლიდერს წარმოშობს“. 

ჯონსონმა განაცხადა, რომ სანამ მისი შემცვლელი არ მოიძებნება, საზოგადოების ინტერესების სამსახურში იქნება.

„პრემიერ-მინისტრობა თავისთავად განათლებაა - მე ვიმოგზაურე დიდი ბრიტანეთის ყველა კუთხეში და აღმოვაჩინე, რომ ამდენი ადამიანი ფლობდა უსაზღვრო ბრიტანულ ორიგინალურობას და მზად არის ძველი პრობლემების ახალი გზებით გადასაჭრელად. მაშინაც კი, თუ ზოგჯერ შეიძლება რაღაც ბნელი ჩანდეს ახლა, ჩვენი მომავალი ერთად ბრწყინვალეა“, - თქვა ჯონსონმა.

დიდი ბრიტანეთის პრემიერ-მინისტრ ბორის ჯონსონზე ზეწოლა სულ უფრო გაიზარდა მას შემდეგ, რაც ხუთშაბათ დილით გადადგომების სერია გაგრძელდა.

დღეს დილით თანამდებობები დატოვეს პენსიების მინისტრმა გაი ოპერმანმა, სასამართლოს მინისტრმა, ჯეიმს კარტლიჯმა, ტექნოლოგიებისა და ციფრული ეკონომიკის მინისტრმა ქრის ფილპმა. როგორც ამ უკანასკნელმა თქვა, "ჯონსონმა თანამდებობა უნდა დატოვოს, რადგან პარლამენტის ნდობა აშკარად გამქრალია".

მანამდე პოსტიდან წასვლის შესახებ განაცხადა ბრენდონ ლუისმა, ჩრდილოეთ ირლანდიის მდივანმა და განაცხადა, რომ მთავრობას სჭირდება „პატიოსნება, მთლიანობა და ურთიერთპატივისცემა“. თანადებობებიდან წავიდნენ ასევე ხაზინის, უსაფრთხოების, მეცნიერების მინისტრები - ჰელენ უოთლი, დემიან ჰაინდსი და ჯორჯ ფრიმენი.

უფრო ადრე, სამშაბათს, ერთმანეთის მიყოლებით პოსტები პროტესტის ნიშნად დატოვეს ჯანდაცვის და ფინანსთა მდივნებმა - საჯიდ ჯავიდმა და რიში სუნაკმა. მინისტრების გადადგომა სექსუალურ სკანდალს უკავშირდება, რომლის გამოც, ბრიტანეთის პრემიერმ-მინისტრმა ბოდიში მოიხადა. საუბარია მმართველი „კონსერვატიული პარტიის“ საპარლამენტო მდივნის მოადგილე კრის პინჩერზე, რომელსაც სექსუალურ შევიწროებაში ედება ბრალი. პინჩერმა ბოდიში მოიხადა და თანამდებობა 30 ივნისს დატოვა. ბორის ჯონსონის განცხადებით, ბოდიშს იხდის იმის გამო, რომ კრის პინჩერი მთავრობაში მუშაობდა.

ოთხშაბათ ღამით, ბორის ჯონსონმა ცხოვრების დონის ამაღლების და საცხოვრებელი საკითხების მდივანი მაიკლ გოუვი გაათავისუფლა მას შემდეგ, რაც მან პრემიერ-მინისტრს უთხრა, რომ უნდა გადამდგარიყო.

ბორის ჯონსონს გადადგომისკენ მოუწოდა ახალმა ფინანსთა მინისტრმა, ნადიმ ზაჰავიმ, რომელიც ამ თანამდებობაზე სამშაბათ საღამოს დაინიშნა. ტვიტერში ის წერს: „ეს არ არის მდგრადი და მხოლოდ გაუარესდება: თქვენთვის, კონსერვატიული პარტიისთვის და რაც მთავარია ქვეყნისთვის. თქვენ უნდა გააკეთოთ სწორი საქმე და წახვიდეთ ახლა“.

შინაგან საქმეთა მდივანი პრიტი პატელი და ტრანსპორტის მდივანი გრანტ შაპსიც მათ შორის არიან, ვინც ჯონსონს თანადებობის დატოვებას ურჩია.

გენერალური პროკურორი სუელა ბრავერმენი ამბობს, რომ ის ხელმძღვანელობის ნებისმიერ გამოწვევაში ჩაერთვება, თუმცა არ გადადგება.