ამერიკის შეერთებული შტატების სახელმწიფო მდივანი რექს ტილერსონი რუსეთის პრეზიდენტ ვლადიმერ პუტინთან და საგარეო საქმეთა მინისტრ სერგეი ლავროვთან მოსკოვში გამართული ორსაათიანი მოლაპარაკებების შემდეგ აცხადებს, რომ რუსეთთან ურთიერთობები დაბალ საფეხურზეა და ის უნდა გაუმჯობესდეს. მან თქვა, რომ „ორ მთავარ ბირთვულ სახელმწიფოს არ შეიძლება ჰქონდეს ეს ურთიერთობები“.

როგორც BBC იუწყება, მიუხედავად იმისა, რომ სირიასთან დაკავშირებით მოლაპარაკებებისას „აზრების თანხვედრას“ ჰქონდა ადგილი, „ფართო განსხვავებები“ მაინც დარჩა.

ლავროვმა განაცხადა, რომ ორივე მხარემ უნდა გადალახოს ბარაქ ობამას ადმინისტრაციიდან მემკვიდრეობით მიღებული „რთული საკითხები“.

ვაშინგტონსა და მოსკოვს შორის დაძაბულობა მას შემდეგ გაიზარდა, რაც სირიის ქალაქ ხან შეიხუნში გასულ კვირას ქიმიური ირაღით თავდასხმა განხორციელდა, რამაც 89 ადამიანის, მათ შორის ბავშვების სიცოცხლე იმსხვერპლა.

ქიმიურ თავდასხმაში შეერთებულმა შტატებმა და მისმა მოკავშირეებმა სირიის მთავრობა დაადანაშაულეს და ვაშინგტონმა საპასუხოდ სირიის შაირათის საჰაერო ბაზაზე სარაკეტო დარტყმები განახორციელა. 

ოფიციალურმა დამასკომ, რომელსაც რუსეთის მხარდაჭერა გააჩნია, უარყო დასავლეთის სახელმწიფოთა ბრალდება ქიმიურ თავდასხმასთან დაკავშირებით. მისმა მთავარმა მოკავშირემ, რუსეთმა კი ოთხშაბათს გაერო-ს უშიშროების საბჭოში ვეტო დაადო წინადადებას, რომელიც ბაშარ ალ-ასადის მთავრობას გამომძიებლებთან თანამშრომლობის ვალდებულებას დააკისრებდა.

BBC-ის ცნობით, მოსკოვმა სირიის დასაცავად ვეტოს უფლება 8-ჯერ გამოიყენა.

ორთავემ, ტილერსონმაც და ლავროვმაც განაცხადა, რომ დისკუსიები გულწრფელი იყო.

ტილერსონმა თქვა: „მე გამოვხატე შეხედულება, რომ აშშ-რუსეთის ამჟამინდელი ურთიერთობები დაბალ საფეხურზეა. დაბალ დონეზეა ჩვენ ორ ქვეყანას შორის ნდობა“.

მან დაამატა: „ჩვენ უნდა ვეცადოთ დავასრულოთ ეს უცვლელი დეგრადაცია, რომელიც ვერაფერს ვერ აკეთებს ჩვენ ქვეყნებს შორის ნდობის აღდგენაში და ვერ ქმნის პროგრესს ორივე ჩვენგანისთვის უდიდესი მნიშვნელობის საკითხებზე“.

ტილერსონის აღნიშნული შეხედულების გამოძახილი იყო თეთრ სახლში ნატო-ს გენერალურ მდივანთან, იენს სტოლტენბერგთან ერთობლივ პრესკონფერენციაზე პრეზიდენტ დონალდ ტრამპის მოგვიანებით გაკეთებული განცხადება: „ამ წუთას რუსეთთან საერთოდ არ გვაქვს მეგობრული ურთიერთობა. ჩვენ შესაძლოა რუსეთთან ურთიერთობების მხრივ ყველა დროის ყველაზე დაბალ საფეხურზე ვდგავართ“.

ტრამპმა თქვა, რომ „ფანტასტიური რამ იქნებოდა“, თუ რუსეთი და აშშ ურთიერთობებს გააუმჯობესებენ, მაგრამ გამაფრთხილებლად განაცხადა, რომ „ის შესაძლოა საწინააღმდეგო იყოს“.