კატალონიის პარლამენტმა დღეს მხარი დაუჭირა რეზოლუციას, რომელიც ესპანეთისგან კატალონიის დამოუკიდებლობას აცხადებს.

ბრიტანული სამაუწყებლო კორპორაციის (BBC) ცნობით, დეკლარაციას ხმა 72-მა დეპუტატმა მისცა, წინააღმდეგი იყო 10, ორმა თავი შეიკავა, დანარჩენმა დეპუტატებმა კი, კენჭისყრას ბოიკოტი გამოუცხადეს.

ესპანეთის სენატი დღეს სრული შემადგენლობით შეიკრიბა და მთავრობის მიერ კატალონიის კრიზისის გადასაჭრელად შეთავაზებულ ზომებს განიხილავს.

მანამდე კი, ესპანეთის მთავრობის თავმჯდომარემ, მარიანო რაჰოიმ განაცხადა, რომ ესპანეთის კონსტიტუციის 155-ე მუხლის ამოქმედებას იწყებს, რომელიც აქამდე არასდროს გამოყენებულა.

კატალონიაში დამოუკიდებლობის შესახებ რეფერენდუმი 1 ოქტომბერს ჩატარდა. 

რეფერენდუმს არეულობები და პოლიციასთან შეხლა-შემოხლა ახლდა თან, რა დროსაც 700-ზე მეტმა ადამიანმა მიიღო დაზიანებები.

კატალონია რიცხვებში:

ესპანეთის მოსახლეობის 16% კატალონიაში ცხოვრობს.

კატალონიას ესპანეთის ექსპორტის 25.6% უკავია.

კატალონიაზე ესპანეთის მშპ-ს (მთლიანი შიდა პროდუქტი) 19% მოდის.

კატალონიაზე უცხოური ინვესტიციების 20.7% მოდის.