დონალდ ტრამპი შეთქმულების გზით ხელისუფლებიდან ჩამოცილების საფრთხის წინაშე დგას, განაცხადა თეთრი სახლის ყოფილმა მთავარმა სტრატეგმა, სტივ ბანონმა და დაამატა, რომ შედეგად, შეერთებული შტატები იმგვარი კრიზისის პირობებში იმყოფება, რომელიც შესაძლოა მხოლოდ აბრაამ ლინკოლნის პრეზიდენტობის სამოქალაქო ომის პერიოდს შეადარო.

როგორც ბრიტანული გაზეთი The Guardian-ი წერს, იტალიაში მიცემულ ინტერვიუში, ტრამპის კამპანიის ყოფილმა მენეჯერმა და თეთრი სახლის ყოფილმა მთავარმა სტრატეგმა გაზეთ the New York Times-ში გამოქვეყნებული ანონიმური წერილი განიხილა, სადაც ტრამპის ადმინისტრაციაში წინააღმდეგობაზეა საუბარი.

„რაც თქვენ იხილეთ მეორე დღეს, ისეთივე სერიოზული იყო, როგორც ის შეიძლება გავიგოთ. ეს არის პირდაპირი თავდასხმა ინსტიტუტებზე. ეს არის სახელმწიფო გადატრიალება“, განაცხადა ბანონმა.

მან აღნიშნა, რომ ბოლოს როცა აშშ-ის პრეზიდენტი ამგვარი გამოწვევის წინაშე იდგა, იყო მაშინ, როცა გენერალი ჯორჯ მაკკლენანი ლინკოლნს დაეტაკა.

„ეს არის კრიზისი. ქვეყანას ამგვარი კრიზისი არ ჰქონია 1862 წლის ზაფხულის შემდეგ, როცა გენერალი მაკკლელანი და მთავარი გენერლები - ყველანი „დემოკრატები“ უნიონთა არმიაში - მიიჩნევდნენ, რომ აბრაამ ლინკოლნი არ შეეფერებოდა პოსტს და არ იყო კომპეტენტური ყოფილიყო ქვეყნის მთავარსარდალი“.

პირველმა „რესპუბლიკელმა“ პრეზიდენტმა შეინარჩუნა პრეზიდენტის პოსტი, დააქვეითა მაკკლელანი, დაასრულა მონათმფლობელობა, გაიმარჯვა ომში და გახდა როგორც ლიბერალების, ისე კონსერვატორების სათაყვანებელი ამერიკული სახე და ხშირად ისტორიკოსების მიერ 2-3 გამორჩეულ პრეზიდენტთა შორის არის მოხსენიებული. ტრამპი, აშშ-ის 45-ე პრეზიდენტი, რეგულარულად იმოწმებს „პატიოსან აბის“, როგორც იშვიათ წინამორბედს, რომელმაც შეძლო მისი [ლინკოლნის] მსგავსი მიღწევების გამეორება.

აბრაამ ლინკოლნი ალან პინკერტონთან და ჯონ მაკკლერნანდთან ერთად 1862 წლის ოქტომბერში, მერილენდში, ანტიეტამის ბრძოლის შემდეგ. ფოტოგრაფი: ალექსანდერ გარდნერი/AP

(„პატიოსანი აბი“ - ასე შეარქვეს აბრაამ ლინკოლნს, მისი მეტისმეტი პატიოსნების გამო. მაგალითად, ერთხელ, როცა ლინკოლნი მაღაზიის კლერკად მუშაობდა, მან შეცდომით 6 ცენტით ზედმეტი გადაახდევინა კლიენტს. იმ ღამით, მას შემდეგ, რაც მაღაზია დაკეტეს, მან ფეხით 3 მილი, დაახლოებით 5კმ გაიარა, რომ კლიენტისთვის ფული უკან დაებრუნებინა).

ტრამპმა პარასკევს განაცხადა, რომ იუსტიციის დეპარტამენტმა უნდა გაარკვიოს, თუ ვინ დაწერა გაზეთ „ნიუ იორკ თაიმსში“ წერილი და დაამატა, რომ ეს ეროვნული უსაფრთხოების საკითხია.

ბანონი ტრამპმა თანამდებობიდან 2017 წლის აგვისტოში დაითხოვა.

ტრამპის ადმინისტრაციის მაღალი რანგის ოფიციალურმა პირმა, რომლის ვინაობაც არ მჟღავნდება, განაცხადა, რომ ადმინისტრაციის წევრები მუშაობენ იმაზე, რომ ჩაშალონ პრეზიდენტის დღის წესრიგის ზოგიერთი ნაწილი იმისათვის, რომ დაიცვან ქვეყანა მისი „ყველაზე საშინელი მიდრეკილებებისაგან“ - მანამდე, ვიდრე პრეზიდენტი დატოვებს ან დაატოვებინებენ ოფისს.

როგორც ბრიტანული „გარდიანი“ წერს, გაზეთ The New York Times-ში გამოქვეყნებულ წერილში ავტორი თანამედროვე ამერიკის ისტორიაში პრეზიდენტისადმი უპრეცედენტო და შოკისმომგვრელი კრიტიკით გამოირჩევა და ტრამპს აღწერს, როგორც „ამორალურს“, „იმპულსურს“, „ანტი-ვაჭრობის და ანტი-დემოკრატიულობის“ სიმბოლოდ, რომელიც მიდრეკილია „ნახევრად-მხარდაჭერილი, არაინფორმირებული და იშვიათი უგუნურების გადაწყვეტილებებისკენ“.

წერილის ავტორის მტკიცებით, თანაშემწეები ტრამპის ოფისიდან მოცილების შესაძლებლობას კონსტიტუციის 25-ე შესწორების მეშვეობით განიხილავენ - კომპლექსური საკონსტიტუციო მექანიზმი, რომელიც ნებას რთავს ვიცე-პრეზიდენტს და კაბინეტის მინისტრების უმრავლესობას კენჭი უყაროს იმ პრეზიდენტის თანამდებობიდან გადაყენებას, ვინც არის „უუნარო, აღასრულოს მისი ოფისისის ვალდებულებები და მოვალეობები“, მაგრამ გადაწყვიტა, რომ ამის წინააღმდეგ წავიდეს.

„ამგვარად, ჩვენ გავაკეთებთ იმას, რისი გაკეთებაც შეგვიძლია, რომ გავუძღვეთ ადმინისტრაციას სწორი მიმართულებით, ვიდრე - ამ თუ სხვა გზით - ის დასრულდება“, წერს ავტორი.

კრიტიკის მიუხედავად, ავტორი დადებით მხარეებზეც ამახვილებს ყურადღებას და ამბობს, რომ „ადმინისტრაციის მიერ გატარებულმა არაერთმა პოლიტიკამ ამერიკა უკვე გახადა უფრო უსაფრთხო და უფრო აყვავებული“. მიუხედავად ამისა, ის აცხადებს, რომ „ტრამპის მიერ პოლიტიკურ თანამდებობებზე დანიშნულმა შეთქმულთა მცირე ჯგუფმა აღთქმა დადო, რომ ყველაფერს გააკეთებს, მისი შესაძლებლობის ფარგლებში, რათა დაიცვან ამერიკის დემოკრატიული ინსტიტუტები და შეაჩერონ ტრამპის უფრო და უფრო შეცდომების გამომწვევი იმპულსები დროის იმ პერიოდში, ვიდრე ის ოფისს მიღმა აღმოჩნდება.

ავტორი ამ ადამიანების ძალისხმევებს „გმირულს“ უწოდებს, რადაგანაც, მისი თქმით, ისინი ბლოკავენ ტრამპის „ცვალებად ქცევას“. შეთქმულთა ჯგუფი ამავე დროს ადმინისტრაციის მიღწევების ზოგიერთ „ნათელ გამოვლინებად“ მიიჩნევს „ეფექტურ დერეგულაციას, ისტორიულ საგადასახადო რეფორმას და სამხედრო ძალების უფრო მეტად გაძლიერებას“.

ტრამპმა ანონიმურ წერილს „ნამდვილად სამარცხვინო“, ანონიმ ავტორს „მხდალი“, ხოლო გაზეთს „ყალბი“ უწოდა. მისმა პრესმდივანმა, სარა სანდერსმა კი განაცხადა, რომ საიდუმლოებით მოცული მწერალი „მხდალია“ და მან თანამდებობა უნდა დატოვოს.