გაერო–ს უშიშროების საბჭომ, ორშაბათს, ახალი რეზოლუციების განხილვა დაიწყო, რამაც დაუყოვნებლივ უნდა მოახდინოს სირიის ქალაქ ალეპოში ბრძოლების დასრულება. ამის შესახებ "დოიჩე ველე" წერს.

საფრანგეთის მიერ შემუშავებული წინადადება გაერო–ს ხელმძღვანელობით ცეცხლის შეწყვეტის მონიტორინგის განხორციელებას ითვალისწინებს და თუკი კონფლიქტის რომელიმე მხარე დაარღვევს მას, "შემდგომი ზომები" უნდა გატარდეს.

"ჩვენ მივიჩნევთ, რომ ეს არის ჩვენი პასუხისმგებლობა, ყველაფერი გავაკეთოთ რაც კი შეგვიძლია, ყველაფერი რაც ადამიანურად შესაძლებელია, გავაერთიანოთ უშიშროების საბჭო ჩვენი მცდელობების გარშემო, რათა დასრულდეს ტანჯვა–წამება ალეპოში", – განაცხადა საფრანგეთის ელჩმა გაეროში, ფრანკოს დელატრემ, უშიშროების საბჭოს შეკრებამდე.

შეერთებული შტატების და რუსეთის შუამავლობით მიღწეული შეთანხმება, სირიაში სამთავრობო ძალებსა და ზომიერ მეამბოხეებს შორის ცეცხლის შეწყვეტის თაობაზე, გასულ კვირას დაირღვა.

რამდენიმე დღის წინათ ცნობილი გახდა, რომ რუსეთი სირიაში, საჰაერო კამპანიის გაფართოების მიზნით, უფრო მეტ სამხედრო თვითმფრინავს აგზავნის. ინფორმაციას ამის შესახებ ახალი ამბების სააგენტო „როიტერსი“ რუსულ გაზეთზე დაყრდნობით ავრცელებს. ეს კი იმ ფონზე ხდება, როდესაც შეერთებულმა შტატებმა განაცხადა, რომ ძალადობის შესაჩერებლად დიპლომატიას „სიცოცხლის შესანარჩუნებელი ჟანგბადი მიეწოდება“ და ჯერ კიდევ არ არის მკვდარი.

„როიტერსის“ ცნობით, რუსეთის მხარდაჭერილი სირიის ახალი მთავრობა იერიშს ახორციელებს მეამბოხეების მიერ დაკავებულ ალეპოს აღმოსავლეთ ნაწილის ხელში ჩასაგდებად და ანადგურებენ 2011 წელს სირიის პრეზიდენტის ბაშარ ალ-ასადის წინააღმდეგ წამოწყებული აჯანყების ბოლო ურბანულ ციხე-სიმაგრეს.

მოსკოვმა და ასადმა არაფრად ჩააგდეს შეერთებული შტატების და რუსეთის შუამავლობით ჟენევაში ცეცხლის შეწყვეტის შესახებ მიღწეული შეთანხმება და წამოიწყეს თავდასხმები მეამბოხეების მიერ დაკავებულ ადგილებზე ალეპოში, რაც, როგორც „როიტერსი“ წერს, პოტენციურად ყველაზე გადამწყვეტი ბრძოლაა სირიის სამოქალაქო ომის პერიოდში.

შეერთებული შტატების სახელმწიფო მდივანი ჯონ ქერი და რუსეთის საგარეო საქმეთა მინისტრი სერგეი ლავროვი 4 დღის წინათ ერთმანეთს ტელეფონით ესაუბრნენ. რუსეთის მთავარმა დიპლომატმა თქვა, რომ მოსკოვი მზადაა ალეპოში მდგომარეობის ნორმალიზებისთვის უფრო მეტი საშუალებების მოძიებაზე იფიქროს.

მაგრამ ლავროვმა გააკრიტიკა ვაშინგტონის მარცხი, განეცალკევებინა ზომიერი მეამბოხე ჯგუფები მათგან, ვისაც რუსები ტერორისტებს ეძახიან, რამაც საშუალება მისცა ჯგუფს, რომელიც წინათ ცნობილი იყო როგორც „ნუსრას ფრონტი“, დაერღვია შეერთებული შტატებისა და რუსეთის მიერ ცეცხლის შეწყვეტის თაობაზე 9 სექტემბერს მიღწეული შეთანხმება.

შეერთებულმა შტატებმა, სახელმწიფო დეპარტამენტის წარმომადგენლის, მარკ ტონერის პირით, ნათლად განაცხადა პარასკევს, რომ ამერიკასა და რუსეთს შორის სირიაში ცეცხლის შეწყვეტის საკითხზე ჟენევაში მიღწეული შეთანხმება, იმის მიუხედავად, რომ ხელოვნურ სუნთქვაზეა გადაყვანილი, ჯერ კიდევ არ არის გარდაცვლილი. „ჩვენ საკმარისი ვიხილეთ, მაგრამ არ გვინდა უკანასკნელად დავხუროთ კარი“.

გასულ კვირას ნიუ იორკში სირიელებთან, დიპლომატებთან და სხვა მხარეებთან გაერო-ს გენერალური ასამბლეის ფარგლებში გამართული 40-წუთიანი შეხვედრისას ჯონ ქერიმ თქვა, რომ ადმინისტრაცია წარუმატებელი აღმოჩნდა, მოეხდინა სამხედრო ძალის რაიმე მუქარა, რაც მას რუსეთთან ბერკეტს მისცემდა.

„მე ვფიქრობ, თქვენ მოძებნით მხოლოდ სამ-ოთხ ადამიანს ადმინისტრაციაში, რომელიც ემხრობა ძალის გამოყენებას და მე ხელიდან გამომეცალა არგუმენტი“, - უთხრა ქერიმ ჯგუფს, The New York Times-ისთვის მიწოდებული სესიის ჩანაწერის თანახმად.