რუსეთი აცხადებს, რომ შეერთებული შტატების ბრალდებები, რომ მან აწარმოა ჰაკერული კამპანია ამერიკის საპრეზიდენტო არჩევნებზე გავლენის მოსახდენად, „კუდიანებზე ნადირობის გამხსენებელია“.

კრემლის წარმომადგენელმა დიმიტრი პესკოვმა ჟურნალისტებს განუცხადა, რომ მოსკოვი დაიღალა ბრალდებებისაგან. მან თქვა, რომ შეერთებული შტატების სადაზვერვო სააგენტოების მიერ მომზადებული ანგარიში უსაფუძვლოა.

ეს არის პირველი ოფიციალური რეაქცია მოსკოვისგან მას შემდეგ რაც პარასკევს, 6 იანვარს სადაზვერვო სააგენტოების ხელმძღვანელებმა დონალდ ტრამპს ანგარიში გააცნეს.

ორშაბათს, თემის კომენტირებისას, პესკოვმა განაცხადა, რომ რუსეთი „კატეგორიულად უარყოფს, რომ მოსკოვი ჩართული იყო რაიმე სახის ჰაკერულ თავდასხმებში“.

„უსაფუძვლო ბრალდებები, რომელიც არაფრით არ არის გამყარებული, არის მრავალჯერ გადმოცემული დილეტანტური, არაპროფესიული გზით. ჩვენ არ ვიცით თუ რა ინფორმაციას ეყრდნობიან ფაქტობრივად ისინი“, თქვა პესკოვმა და დაამატა, რომ განცხადებები „კუდიანებზე ნადირობას“ აგონებს.

ამერიკის სადაზვერვო სამსახურების ანგარიშის არასაიდუმლო ნაწილი შეიცავს ბრალდებებს, რომ რუსეთის პრეზიდენტმა ვლადიმერ პუტინმა გასცა ბრძანება, განეხორციელებინათ ჰაკერული თავდასხმა „დემოკრატიული პარტიის“ ელექტრონულ წერილებზე, რათა ზიანი მიეყენებინათ დონალდ ტრამპის მეტოქის, ჰილარი კლინტონისთვის და გავლენა მოეხდინათ არჩევნებზე.