არგენტინის სამხედრო-საზღვაო ფლოტმა განაცხადა, რომ იმ ადგილის სიახლოვეს, სადაც გასულ კვირას წყალქვეშა გემი გაუჩინარდა, აფეთქების ხმა გაიგეს.

როგორც BBC იუწყება, საზღვაო ფლოტის წარმომადგენელმა განაცხადა, რომ „არანორმალური, უცნაური, მოკლე, ძლიერი, არატრადიციული მოვლენა“ იქნა გამოვლენილი ატლანტის ოკეანის სამხრეთ ნაწილში.

წყალქვეშა გემი „სან-ხუანი“, რომლის ბორტზეც ეკიპაჟის 44 წევრი იმყოფებოდა, გასული კვირის ოთხშაბათს გაუჩინარდა.

კაპიტანმა ენრიკე ბალბიმ განაცხადა, რომ არგენტინის საზღვაო ფლოტს ეცნობა იმ საეჭვო აფეთქების შესახებ, რომელიც გემის, ამ დრომდე ცნობილი ბოლო ადგილმდებარეობის სიახლოვეს მოხდა.

კაპიტანმა ბალბიმ განაცხადა, რომ საზღავო ფლოტმა საეჭვო აფეთქების მხოლოდ ადგილმდებარეობა იცის და არა მისი მიზეზი.

მისი თქმით, სამძებრო სამუშაოები ამ ადგილას იქნება კონცენტრირებული.

ოთხშაბათს, კაპიტანმა ბალბიმ განაცხადა, რომ გემის ბორტზე ჟანგბადის ამოწურვის პრობლემა იქნება.

ნათესავები ახალ ამბებს მარ დელ პლატას სამხედრო-საზღვაო ბაზის გარეთ ელოდებიან.

ეკიპაჟის ერთ-ერთი წევრის დამ განაცხადა: „თავს ისე ვგრძნობ, რომ თითქოს გვამს ველოდები“.

სამძებრო სამუშაოებში სხვა ქვეყნებს შორის ბრაზილია, ჩილე, კოლუმბია, საფრანგეთი, გერმანია, პერუ, სამხრეთ აფრიკა, ურუგვაი, დიდი ბრიტანეთი არიან ჩართული და ამ ქვეყნებიდან ზოგმა გემები, ზოგმა კი თვითმფრინავები გააგზავნა არგენტინის დასახმარებლად.

შეერთებული შტატების საზღვაო ფლოტმა ორი წყალქვეშა სატრანსპორტო საშუალება განალაგა, რომელიც ულტრახმოვან ლოკატორს იყენებს ზღვის ფსკერზე გამოსახულებების შესაქმნელად.

„ნასას“ კვლევითმა თვითმფრინავმა სამძებრო ადგილებს გადაუფრინა, მაგრამ ვერაფერი შენიშნა, იუწყება BBC.