ხორავას ქუჩაზე მოკლული არასრულწლოვნის, დავით სარალიძის მამა ზაზა სარალიძემ პროკურორ ზვიად ფხაკაძის განცხადებას ეხმაურება. ზაზა სარალიძე ადასტურებს, რომ ის მოკლეტექსტურ შეტყობინებებს უგზავნიდა ფხაკაძეს მაშინ, როდესაც მისი შვილის მკვლელებს იცავდა.

„ვაგინებდი მკვდარს და ცოცხალს იქიდან გამომდინარე, რომ კიდევ ჩემი შვილის მკვლელს იცავს კბილებით და ვთხოვდი, სად არის ჩემი შვილის მკვლელი-მეთქი. ახლაც შევაგინებ, თუ გინდათ. რა, სასამართლო დარბაზიდან რომ გამოვედი, არ ვაგინებდი? მაშინ რატომ არ მომთხოვა პასუხი. თუ კაცია და ვაჟკაცია, ადგეს და გაასაჯაროვოს, დახურულ სხდომაზე გავასაჯაროვებო, რომ ამბობს, გაასაჯაროოს პირდაპირ, რომ მთელმა საქართველომ ნახოს, რატომ ვაგინებდი და რა სიტყვებით ვაგინებდი. რას ნიშნავს მუქარის შემცველი ტექსტები? გაასაჯაროვოს და საზოგადოებამ ნახოს. ვაგინებდი მკვდარს და ცოცხალს. სადაც შევხვდები, იქაც ვაგინებ კიდევ მკვდარს და ცოცხალს იმიტომ, რომ ჩემი შვილის მკვლელის ხელისდამფარებელია", განუცხადა ზაზა სარალიძემ ჟურნალისტებს.

პროკურორ ზვიად ფხაკაძე კი აცხადებს, რომ საგამოძიებო კომისიის სხდომაზე ზაზა სარალიძის სახელით მუქარის შემცველი შეტყობინებები მიიღო.