საქართველოს ეროვნული ნაკრების ვიცეკაპიტანი, გურამ კაშია მორიგი შეურაცხყოფის მსხვერპლი გახდა. გურამ კაშიას მიმართ შეურაცხყოფა ამჯერად UEFA-ს გადაწყვეტილებას მოჰყვა, რომლის მიხედვითაც, ვიცეკაპიტანს ლგბტ თემის მხარდაჭერისთვის UEFA თანასწორობის ჯილდოს გადასცემს.

„პატრიოტთა ალიანსის“ წევრი კონსტანტინე მორგოშია  გურამ კაშიას „ფეისბუქის“ საშუალებით დაემუქრა, „კურიერთან“ სატელეფონო საუბრისას კი საპროტესტო აქცია დაანონსა, რომელიც 9 სექტემბერს გაიმართება, იმისთვის რომ გურამ კაშიამ არ მიიღოს მონაწილეობა საქართველოს ეროვნული ნაკრების თამაშში.

„...შენ ჩამოდი 9 სექტემბერს თბილისში და დანარჩენს კი ნახავ“, წერს სოციალურ ქსელში კონსტანტინე მორგოშია.

„საქართველოს ნაკრების გულშემატკივრები გვიკავშირდებიან და გვეუბნებიან, რომ 9 სექტემბერს მივიდეთ და საშუალება არ მივცეთ, რომ ითამაშოს, ოღონდ ძალით კი არ ჩავუხტებით სტადიონზე, უბრალოდ არ უნდა გამოვიდეს საქართველოს ეროვნული ნაკრების მაისურით, პროტესტზეა საუბარი, ძალადობას არ ვაპირებთ. ათასობით ადამიანი მივა და პროტესტი, სტვენა, რა ვიცი...“ განაცხადა მორგოშიამ.

სპორტსმენი კი Instagram-ში წერს, რომ სანამ ერთი გულშემატკივარი მაინც ეყოლება საქართველოში, მისთვის გამოცხადდება და ითამაშებს ეროვნულ ნაკრებში.

რამდენიმე წუთის წინ კი კონსტანტინე მორგოშიამ სოციალურ ქსელ „ფეისბუქში“ დაწერა, რომ ამ საქმესთან დაკავშირებით შსს-ში დაიბარეს.

გურამ კაშიას მიერ  გასულ წელს თამაშის დროს ლგბტ თემის დროშის ფერების სამკლაურის გაკეთებას საქართველოს მოსახლეობის ნაწილის მხრიდან უარყოფითი შეფასება მოჰყვა, ხოლო „უეფამ“  ქართველი ფეხბურთელი ლგბტ თემის მტკიცე და უდრეკი მხარდაჭერისათვის  თანასწორობის პრიზით დააჯილდოვა.

„დიდი პატივია, როდესაც ისეთი ორგანიზაცია გაჯილდოებს, როგორიც უეფაა. ძალიან მნიშვნელოვანია და მე მართლაც ამაყი ვარ ამ ჯილდოთიო. დიდი მიღწევაა ჩემთვის, ჩემი ოჯახისთვის და იმედი მაქვს, ჩემი ქვეყნისთვისაც. UEFA ასეთ საკითხებს დიდ ყურადღებას ანიჭებს, რაც ძალიან კარგია. მე ყოველთვის ვიქნები ადამიანების თანასწორობის მხარეს მოედანზეც და მოედნის გარეთაც. მე მართლაც ამაყი ვარ და ძალიან მაგარია, რომ ამ ჯილდოს ვიღებ“, განაცხადა გურამ კაშიამ.