ინდონეზიელმა გამომძიებლებმა განაცხადეს, რომ „Lion Air“-ის თვითმფრინავი, რომელმაც გასულ თვეს კატასტროფა განიცადა და რის შედეგადაც 189 ადამიანი დაიღუპა, გასაფრენად უვარგისი იყო.

წინასწარი გამოკვლევების მიხედვით, მანამდე განხორციელებულმა ფრენებმა აჩვენა, რომ ადგილი ჰქონდა პრობლემებს, თუმცა გამოძიებას არ დაუკონკრეტებია თუ რა სახის იყო ეს პრობლემები.

სატრანსპოტო უსაფრთხოების ეროვნულმა კომიტეტმა დაადგინა, რომ Lion Air -მა თვითმფრინავის გაფრენას მწვანე შუქი აუნთო იმის მიუხედავად, რომ მას ადრინდელი ფრენებისას პრობლემები შეექმნა.

„იმ [საბედისწერო] ფრენის დროს თვითმფრინავს ტექნიკური პრობლემები გააჩნდა, მაგრამ მფრინავმა გადაწყვიტა გაფრენილიყო“, განუცხადა ეროვნული სატრანსპორტო უსაფრთხოების კომიტეტის წარმომადგენელმა ჟურნალისტებს, როგორც ამას BBC იუწყება.

„ჩვენი მოსაზრებით, თვითმფრინავი უკვე აღარ იყო ვარგისი იმისათვის, რომ შემდგომი გაფრენა განეხორციელებინა“, აღნიშნა სატრანსპორტო უსაფრთხოების კომიტეტმა, თუმცა არ დააკონკრეტა ავიალაინერის ტექნიკური პრობლემები.

Lion Air-ის კუთვნილი სამგზავრო თვითმფრინავი, „ბოინგ 737“, რომლის ბორტზეც 189 ადამიანი იმყოფებოდა, გასული თვის ბოლოს, ინდონეზიის დედაქალაქ ჯაკარტას აეროპორტიდან აფრენიდან მალევე ზღვაში ჩავარდა - არც ერთი გადარჩენილი არ არის ნაპოვნი.