ამერიკის შეერთბული შტატების გენერალურ პროკურორზე (იუსტიციის მინისტრი) ჯეფ სეშენსზე ამერიკის საპრეზიდენტო არჩევნების პერიოდში, რუსეთის ელჩთან, სერგეი კისლიაკთან შეხვედრების გამო, ზეწოლა იზრდება. მან ადრე განაცხადა, რომ „არ ჰქონია რუსეთთან კომუნიკაციები". ინფორმაციას BBC ავრცელებს.

იუსტიციის დეპარტამენტმა დაადასტურა, რომ გასული წლის ივლისსა და სექტემბერში სეშენსს, როგორც სენატის შეიარაღებული ძალების კომიტეტის წარმომადგენელს, შეხვედრა ჰქონდა ელჩ სერგეი კისლიაკთან.

ხუთშაბათს, სეშენსმა განაცხადა, რომ იგი არ შეხვედრია „არასოდეს არც ერთ რუსს რაიმე პოლიტიკური კამპანიის განსახილველად".

აშშ-ის სადაზვერვო საზოგადოებას სჯერა, რომ რუსეთი ჩაერია ამერიკის არჩევნებში დონალდ ტრამპის სასარგებლოდ. ვაშინგტონმა რუსული ჰაკერული თავდასხმის უკან მდგომი რუსი აგენტების იდენტიფიცირებაც მოახდინა.

თავად ტრამპმა კი, ამერიკის არჩევნებზე საკამათოდ ქცეულ რუსულ ჰაკერულ ჩარევას „კუდიანზე ნადირობა“ უწოდა. 

შეერთბული შტატების პრეზიდენტის მრჩეველმა ეროვნული უსაფრთხოების საკითხებში მაიკლ ფლინმა გასულ თვეს თანამდებობა სწორედ რუსეთთან კონტაქტის გამო დატოვა, ახლა კი დემოკრატები გენერალური პროკურორის ჯეფ სეშენსის გადადგომას ითხოვენ.

The Washington Post-ის ცნობით, სეშენსს და კისლიაკს კერძო საუბარი ჰქონდათ გასული წლის სექტემბერს სეშენსის ოფისში და უფრო ადრე კი, მას კისლიაკთან საუბარი სხვა ელჩებთან შეხვედრაზეც ჰქონდა.

როგორც BBC წერს, სეშენსს გასულ წელს, უცხო ქვეყნის 25-ზე მეტ ელჩთან ჰქონდა შეხვედრა, მაგრამ კისლიაკთან შეხვედრებს მაშინ ჰქონდა ადგილი, როცა იგი ტრამპის საარჩევნო კამპანიის ცნობილი წარმომადგენელი იყო, რაც რუსეთის აშშ-ის ჩარევის ეჭვებს ზრდის.