რუსეთის მიერ აშშ-ის 2016 წლის საპრეზიდენტო არჩევნებში შესაძლო ჩარევასთან დაკავშირებით მიმდინარე გამოძიების ფარგლებში პრეზიდენტ დონალდ ტრამპის ყოფილი მთავარი სტრატეგი სტივ ბანონი დაიკითხა.

BBC-ის ცნობით, იგი მიმდინარე კვირის განმავლობაში სპეციალურ პროკურორს, რობერტ მიულერს, რომელიც გამოძიებას ხელმძღვანელობს, ორჯერ, ხანგრძლივი დროით შეხვდა.

თეთრი სახლის უმაღლეს ოფიციალურ პირად გახდომამდე ბანონი ტრამპის საპრეზიდენტო კამპანიის ხელმძღვანელი იყო, მაგრამ მან სხვა თანაშემწეებთან ურთიერთობების დაძაბვის გამო თანამდებობა 2017 წლის აგვისტოში დატოვა.

მიულერი ხელმძღვანელობს გამოძიებას, რომელმაც უნდა დაადგინოს, იყო თუ არა საიდუმლო შეთანხმება რუსეთსა და ტრამპის საარჩევნო კამპანიას შორის, რასაც შესაძლოა გავლენა მოეხდინოს აშშ-ის არჩევნებზე. ორივე, მოსკოვიც და ტრამპიც ამას უარყოფენ. აშშ-ის პრეზიდენტმა აღნიშნულს არაერთხელ უწოდა „კუდიანებზე ნადირობა“.

გამომძიებლები დარწმუნებული არიან, რომ ბანონი შესაძლოა, გადამწყვეტი ინფორმაციის მფლობელი იყოს ტრამპის ადმინისტრაციის საქმიანობაზე, მათ შორის იცნობდეს დეტალებს თუ რატომ გაათავისუფლა პრეზიდენტმა თანამდებობიდან ფედერალური საგამოძიებო ბიუროს დირექტორი ჯეიმს კომი, რასაც გასული წლის ოქტრომბრის დასაწყისში ბანონმა ტრამპის უდიდესი შეცდომა უწოდა „თანამედროვე პოლიტიკურ ისტორიაში“. 

ცნობილი არ არის თუ რის შესახებ დაუსვეს ბანონს შეკითხვები, მაგრამ გავრცელებული ცნობით, მან მიულერის გუნდთან დაახლოებით 20 საათი დაჰყო.

პროცესთან ახლოს მყოფმა წყარომ The Associated Press -ს უთხრა, რომ ბანონმა ყველა მისთვის დასმულ შეკითხვას გასცა პასუხი.

ბანონმა თეთრი სახლი 18 აგვისტოს დატოვა და იმავე დღეს დაუბრუნდა თავის ულტრა-მემარჯვენე მედიას Breitbart-ს და პირობა დადო, რომ ტრამპის მხარდაჭერას განაგრძობდა.