რუსეთის წინააღმდეგ სანქციების შემდგომი გაძლიერება შესაძლოა შეფასდეს, როგორც ეკონომიკური ომის გამოცხადება, განაცხადა რუსეთის ფედერაციის პრემიერ მინისტრმა დიმიტრი მედვედევმა კრონოცკის სახელმწიფო ნაკრძალის თანამშრომლებთან შეხვედრისას.

„სამომავლო სანქციების შესახებ კომენტარის გაკეთება არ მინდა, მაგრამ შემიძლია ვთქვა ერთი: თუკი ამას მოჰყვება ბანკების საქმიანობის, ანდა რომელიმე ვალუტის გამოყენების რაიმე ტიპის აკრძალვა, მაშინ ამას შეიძლება სრულიად პირდაპირ ვუწოდოთ ეკონომიკური ომის გამოცხადება. და ამ ომის წინააღმდეგ გარდაუვლად უნდა მოვახდინოთ რეაგირება - ეკონომიკური მეთოდებით, პოლიტიკური მეთოდებით, და თუ საჭიროა სხვა მეთოდებით. და ჩვენმა ამერიკელმა მეგობრებმა ეს უნდა გაიგონ“, განაცხადა მედვედევმა, როგორც ამას „რია ნოვოსტი“ იტყობინება.

უკვე დაწესებულ და ახლახან გამოცხადებულ სანქციებზე საუბრისას რუსეთის პრემიერმა თქვა: „როგორც არ უნდა ამტკიცებდნენ დასავლელი პარტნიორები, რომ რუსები ცუდები არიან, ისინი მცდარ პოლიტკას ატარებენ იმასთან დაკავშირებით, რომ რუსეთმა უნდა შეიცვალოს თავისი პოზიციები მთელ რიგ საკითხებზე, მაგრამ ძირითადად, ეს არის შეზღუდვა ჩვენი ეკონომიკური სიძლიერის“.

პრემიერმა დაამატა, რომ მოსკოვთან მიმართებაში სანქციები არაერთხელ ყოფილა დაწესებული საბჭოთა პერიოდშიც.

„ჩვენი ქვეყანა ბოლო 100 წლის განმავლობაში მუდმივი სანქციების პირობებში არსებობდა. რისთვის კეთდება ეს? იმისათვის, რომ მოიცილონ რუსეთი მძლავრი კონკურენტების რიცხვიდან საერთაშორისო არენაზე“, აღნიშნა მედვედევმა.

აშშ-ის მიერ რუსეთის წინააღმდეგ დაწესებული ახალი სანქციები

შეერთებული შტატების მიერ რუსეთის წინააღმდეგ ახალი სანქციების გამოცხადების ფონზე, რუსული რუბლი გაუფასურებას განაგრძობს.


დოლარის კურსი 0.8 პუნქტით გამყარდა და ერთი ამერიკული დოლარის ფასი 66.35 რუბლი გახდა. ევროს კურსმა 0.83 პუნქტით იმატა და ერთი ევროს ღირებულება 76.95 რუბლი გახდა. ამ დრომდე, ერთი ამერიკული დოლარის ფასი 66.64 რუბლს, ხოლო ერთი ევრო - 77.27 რუბლს შეადგენდა.


გასულ დღეს სახელმწიფო დეპარტამენტმა მოსკოვის წინააღმდეგ ახალი სანქციების დაწსების შესახებ გამოაცხადა, რაც „სოლსბერიში ქიმიური იარაღის გამოყენებას“ უკავშირდება.


სანქციები ორ ეტაპად დაიყო. პირველი, რომელიც ძალაში 15 დღეში შევა, გულისხმობს ელექტრონული მოწყობილოობებითა და ორმაგი მოხმარების პროდუქტებით მომარაგების შეწყვეტას. მეორე ეტაპი ძალაში 90 დღეში შევა, რომელიც გულისხმობს რუსეთთან დიპლომატიური ურთიერთობების შეზღუდვებს, რუსეთის ავიახაზების „აეროფლოტის“ ფრენების შეწყვეტასა და შეერთებული შტატების ექსპორტის თითქმის მთლიან აკრძალვას. ვაშინგტონმა განაცხადა, რომ თუ რუსეთი ქიმიური იარაღის გამოუყენებლობის გარანტიას მისცემს და გაეროს მონიტორინგის სამსახურს უფლებას მისცემს, „ადგილზევე“ დაათვალიეროს და შეამოწმოს გარკვეული ლოკაციები, მაშინ სანქციების მეორე ეტაპს გააუქმებს.


მარტში, რუსეთის ფედერაციის „გრუს“ ყოფილი აგენტი სერგეი სკრიპალი და მისი ქალიშვილი ოლია, ინგლისის ქალაქ სოლსბერიში ქიმიური ნივთიერებით, ე.წ. ნოვიჩოკით მოწამლეს. დიდმა ბრიტანეთმა ხელი მოსკოვისკენ გაიშვირა და ქვეყნიდან რუსი დიპლომატები გააძევა, რასაც დასავლეთის სხვა სახელმწიფოთა მხრიდანაც ანალოგიური ქმედება მოჰყვა და ჯამში 180-ზე მეტი რუსი დიპლომატი იქნა გაძევებული, მათ შორის შეერთებული შტატებიდან 60. საპასუხო სარკისებური ზომები მიიღო მოსკოვმაც. 


აღნიშნულ ფაქტთან კავშირს კი რუსეთი კატეგორიულად უარყოფს. მაისში, რუსეთის ფედერაციის საგარეო საქმეთა მინისტრმა, სერგეი ლავროვმა განაცხადა, რომ სკრიპალების საქმეში რუსეთის კავშირის დამადასტურებელი სამხილები არ არსებობდა.