კრასნოდარში ცეცხლსასროლი ავტომატური იარაღით 23 აგვისტოს დაჭრილი ცნობილი ქართველი ბიზნესმენი, მინდია გულუა რეანიმაციული განყოფილებიდან ჩვეულებრივ პალატაში გადაიყვანეს და მის სიცოცხლეს საფრთხე არ ემუქრება. ეს ინფორმაცია Guardian.ge–ს გულუას ოჯახთან დაახლოებულმა პირმა, დაჭრილი ბიზნესმენის ოჯახის ერთ–ერთ წევრზე დაყრდნობით განუცხადა. 

აღნიშნული ინფორმაციის თანახმად, რუსეთში მოღვაწე ქართველ მილიონერს თავდასხმისას ტყვია მუცლის არეში მოხვდა, რის შედეგადაც ნეკნი დაუზიანდა. ოჯახის ერთ–ერთი წევრის თქმით, გულუას მისი დაცვის წევრი გადაეფარა. ამ დროისთვის, დაცვის წევრის ჯანმრთელობის მდგომარეობაც სტაბილურია.

Guardian.ge–სთვის მიწოდებული ინფორმაციის მიხედვით, ქართველ ბიზნესმენზე განხორციელებული თავდასხმის მონაწილე პირები დაკავებული არიან.

რუსული მედიის ცნობით, გულუაზე თავდასხმა 23 აგვისტოს ჩეკისტების პროსპექტზე, იუბილეინის მკ/რ-ში მოხდა. უცნობმა მამაკაცმა კრასნოდარელ ბიზნესმენსა და მის დაცვას ავტომატის ტიპის ცეცხლსასროლი იარაღიდან ესროლა, შემდგომ ჩაჯდა ავტომანქანაში, მივიდა დუმენკოს ქუჩაზე, სადაც ავტომანქანას ცეცხლი წაუკიდა.

აღსანიშნავია, რომ 2006 წელს კრასნოდარში, ძერჟინსკის ქუჩაზე აფეთქდა ჯიპის ტიპის ავტომანქანა, რომელშიც მინდია გულუა იმყოფებოდა. მაშინ მან მრავლობითი ჭრილობები მიიღო, რაც სიცოცხლესთან შეუთავსებელი არ აღმოჩნდა.

47 წლის გულუა კრასნოდარში ოთხი მსხვილი კომპანიის მფლობელია. იგი საქართველოში წინა წლებში პოლიტიკურ საქმიანობასაც ეწეოდა. გულუა არის პოლიტიკური გაერთიანება "განახლებული საქართველოსთვის" დამფუძნებელი.

მას საქართველოში მედიის მიმართულებითაც ჰქონდა ინტერესები. გულუა 2011-2014 წლებში რამდენიმე ქართულ მედიასაშუალებას, გაზეთებსა და სააგენტოებს აფინანსებდა, მათ შორის, ახალი ამბების სააგენტო "ივერონს".