„ვფიქრობ, რომ პარტიულ არჩევნებში, პარტიული სია სადაცაა, მინიმუმ 48%-დან მაქსიმუმ 54%-მდე დიაპაზონში „ქართული ოცნება“ მიიღებს მხარდაჭერას. მაჟორიტარულ არჩევნებში კი მინიმუმ 60, მაქსიმუმ 70 მაჟორიტარი უნდა გაიყვანოს „ქართულმა ოცნებამ“, - განაცხადა ყოფილმა პრემიერმა, ბიძინა ივანიშვილმა მცხეთა-მთიანეთის რეგიონში, ბაზალეთზე მედიის წარმომადგენლებთან შეხვედრაზე.

რაც შეეხება კითხვას მრავალპარტიული იქნება თუ არა პარლამენტი, ივანიშვილი მიიჩნევს, რომ პარლამენტი იქნება მრავალპარტიული, რადგან მისი თქმით, პარლამენტში 5-6 პარტია შევა.     

„იმედის“ ბოლო კვლევების მიხედვით, გამოიკვეთა რამდენიმე პარტია. 3-4%-თან იყო ძალიან ბევრი პარტია. ყველაზე კარგი შედეგი ჰქონდა „თავისუფალ დემოკრატებს“. ბოლო ორ კვირას რაც მოხდა გარდაქმნები და პირველ რიგში აგონიაში მყოფმა „ნაციონალურმა მოძრაობამ“ ძალიან გამოააშკარავა საკუთარი სახე და გაჩნდა შანსი, რომ „თავისუფალი დემოკრატები“ მეორე ადგილზე გავიდნენ. ასეთი სცენარით „ნაციონალური მოძრაობა“, ალბათ, გავა 5 კაცით, მიიღებს თავის მინიმუმს, არ გამოვრიცხავ, რომ საერთოდაც ვერ შევიდეს. ვნახოთ დარჩენილ 3 დღეში ახალი სისულელეები აჩვენონ. არ გამოვრიცხოთ, რომ პარლამენტს გარეთ დარჩნენ“,-განაცხადა ივანიშვილმა და დასძინა, რომ კარგი იქნებოდა, „ნაციონალური მოძრაობა“ პარლამენტში 5 კაცით მაინც იყოს წარმოდგენილი, რომ  ხალხს არ დაავიწყდეს ვინ არიან და რას წარმოადგენენ.   

„მრავალპარტიული უნდა იყოს პარლამენტი, ამის მომხრე ვიყავი მუდამ. იმ 100 კაცს, როდესაც ვამბობ საშუალოდ „ქართული ოცნებიდან“, რასაც ვიმეორებ დღესაც მინიმუმ 90 მაქსიმუმ 110-ზეც შეიძლება ავიდეს და კიდეც გადაცდეს. ასეთ შედეგსაც არ გამოვრიცხავ. ეს არ ქმნის საფრთხეს. რჩება იქ ადგილი. დომინანტი პარტია დღეს არის „ქართული ოცნება“ და მე შემთხვევით არ ვუჭერ მხარს. არ მოუწევს „ქართულ ოცნებას“ კოალიციური მთავრობის ჩამოყალიბება. ოპონირება იქნება გარედანაც, იქნება პარლამენტშიც“,-განაცხადა ყოფილმა პრემიერმა.