შავ ზღვაში უზარმაზარი სამძებრო ოპერაციიდან - მას შემდეგ რაც კვირას, გამთენიისას, სოჭიდან აფრენილმა რუსულმა სამხედრო თვითმფრინავმა, რომლის ბორტზეც 92 ადამიანი იმყოფებოდა, კატასტროფა განიცადა და შავ ზღვაში ჩავარდა - მეორე დღეს თვითმფრინავის „შავი ყუთი“ იპოვეს. ამის შესახებ BBC რუსულ მედიაზე დაყრდნობით წერს.
სოჭის სიახლოვეს, სამძებრო ოპერაციაში 3 000-ზე მეტი ადამიანი გემებით, თვითმფრინავებით, ვერტმფრენებით, წყალქვეშა გემებით იყო ჩართული და ცხედრების ძებნის სამუშაოები კვლავ გრძელდება.
შავ ზღვაში ჩამოვარდნილ რუსულ სამხედრო თვითმფრინავზე მყოფი 92-ივე ადამიანი დაიღუპა. „ტუ-154“-ის ბორტზე, რომელიც მოსკოვიდან სირიაში მიფრინავდა და საწვავის შესავსებად სოჭში დაშვების შემდეგ აფრენიდან 2 წუთში გაუჩინარდა რადარებიდან, წითელი არმიის გუნდის მომღერლები, მოცეკვავეები, ორკესტრის წევრები და ჟურნალისტები იმყოფებოდნენ.
(წითელი არმიის გუნდისა და ორკესტრის წევრები, ცნობილი როგორც ალექსანდროვის ანსამბლი, 2016 წლის აპრილი, მოსკოვი).
რუსეთის თავდაცვის სამინისტროს წარმომადგენლის, გენერალ-მაიორ იგორ კონაშენკოვის განცხადებით თვითმფრინავის ბორტზე მყოფთაგან არავინ გადარჩენილა.
როგორც კონაშენკოვმა ჟურნალისტებს განუცხადა, თვითმფრინავმა ინციდენტამდე ბოლო ფრენა სექტემბერში განახორციელა და მას მნიშვნელოვანი შეკეთება 2014 წლის დეკემებრში ჩაუტარდა, ავიალაინერს კი „გამოცდილი“ მფრინავი მართავდა.
სანკტ-პეტერბურგში გაკეთებული სატელევიზიო კომენტარისას, ვლადიმერ პუტინმა 26 დეკემბერი ეროვნული გლოვის დღედ გამოაცხადა.
რუსეთის ოფიციოზის ცნობით, სამძებრო ჯგუფი, მათ შორის 109 მყვინთავი, მთელი ღამე მუშაობდა.
რუსეთის თავდაცვის სამინისტროს ინფორმაციით, „რუსეთის თავდაცვის სამინისტროს კუთვნილი თვითმფრინავის „ტუ-154“-ის ფრაგმენტებია ნაპოვნი ქალაქ სოჭის შავი ზღვის სანაპიროდან 1.5 კილომეტრში, 50-70 მეტრის სიღრმეში“. უფრო ადრე კი სამძებრო ჯგუფმა ზღვიდან 11 ცხედარი ამოიყვანა.
ჩამოვარდნილი ავიალაინერის საძიებო საქმეში კრასნოდარის მხარისა და მეზობელი რეგიონების ყველა სამძებრო-სამაშველო სამსახური იყო ჩართული.
წინასწარი მონაცემებით, რუსეთის თავდაცვის სამინისტროს კუთვნილი Ту-154-ის სოჭში ავარიის მიზეზი ტექნიკური გაუმართაობა ან მფრინავის მიერ მართვისას დაშვებული შეცდომა იყო, განუცხადა წყარომ „რია ნოვოსტის“ ძალოვანი სტრუქტურებიდან.
უფრო ადრე რუსეთის თავდაცვის სამინისტროს პრესსამსახურმა განაცხადა, რომ თვითმფრინავი ადლერის აეროპორტიდან გეგმიური ფრენის შესრულებისას რადარებიდან გაუჩინარდა. ბორტზე 83 მგზავრი და ეკიპაჟს 8 წევრი იმყოფებოდა.
რუსეთის თავდაცვის სამინისტროს წარმომადგენელმა იგორ კონაშენკოვმა განაცხადა, რომ ჩამოვარდნილ თვითმფრინავში სამხედროები, ასევე ალექსანდროვას სახელობის ცნობილი სამხედრო ანსამბლის მსახიობები და 9 ჟურნალისტი იმყოფებოდნენ.
მისი თქმით, ისინი სირიაში მიფრინავდნენ, რათა იქ დისლოცირებულ რუსული ჯარებთან ერთად საახალწლო ღონისძიებებში მიეღოთ მონაწილეობა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIANGE.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
GUARDIAN.GE - ჩრდილოეთ კორეის ლიდერი კიმ ჩენ ინი სექტემბერში რუსეთში პრეზიდენტ ვლადიმერ პუტინთან შესახვედრად გამგზავრებას აპირებს, იტყობინება BBC-ის პარტნიორი CBS-ი ამერიკელ ოფიციალურ პირზე დაყრდნობით. ორი ლიდერი განიხილავს შესაძლებლობას, რომ ჩრდილოეთ კორეამ მოსკოვს იარაღი მიაწოდოს უკრაინაში ომის მხარდასაჭერად, განაცხადა ოფიციალურმა წარმომადგენელმა. დაგეგმილი შეხვედრის ზუსტი ადგილი უცნობია. წყაროებმა „The New York Times“-ს განუცხადეს, რომ კიმი, სავარაუდოდ, ბრონირებული მატარებლით გაემგზავრება.