„ერთიან ნაციონალურ მოძრაობაში“ დაწყებული დაპირისპირება გრძელდება და პარტიის აღმასრულებელი მდივნის მიერ ცესკო-სთვის „ნაციონალური მოძრაობის“ პარტიული სიიდან გარკვეული პირების ამოღების მოთხოვნის მიმართვის შემდეგ, პოლიტიკური ბრძოლა უმაღლეს საკანონმდებლო ორგანოში ინაცვლებს, სადაც დღის წესრიგში ნიკა მელიას ფრაქცია „ნაციონალური მოძრაობის“ თავმჯდომარეობიდან გადაყენების საკითხი დგება.

როგორც დღეს ჟურნალისტებს, პარტიის პოლიტიკური საბჭოს ერთ-ერთმა წევრმა, მიხეილ სააკაშვილის ფრთის წარმომადგენელმა, ზაზა ბიბილაშვილმა განუცხადა, ორშაბათს იგეგმება ნიკა მელიას „დაბარება წერილობით ფრაქციის სხდომაზე, რაღაც ამხანაგური სასამართლოს მოსაწყობად“, რაშიც ბიბილაშვილის თანამოაზრე ამავე პარტიიდან ნინო კალანდაძე, თბილისის ყოფილი მერის, პატიმრობიდან ახლახან გათავისუფლებული გიგი უგულავას ხელწერას ხედავს, რომელსაც, კალანდაძის თქმით, განზრახული აქვს ნიკა მელიას „ფრაქციიდან გარიცხვა“. ამ ფონზე კი სააკაშვილის მხარეს მყოფი „ნაციონალური მოძრაობის“ წამყვანი ფიგურები მათივე პარტიის დაპირისპირებულ ფრთასთან მოლაპარაკებების გამართვაში აზრს ვერ ხედავენ და მას არაეფექტურად მიიჩნევენ.

„ორი დღის წინ ამ ჯგუფმა საზოგადოების და ამომრჩევლის ზურგს უკან დემოკრატიული სტანდარტების და ეთიკური ნორმების ცინიკური უგულვებელყოფით შეცვალა დამტკიცებული საპარლამენტო სია და იქიდან ამოიღო ის ადამიანები, რომლებიც იყვნენ სხვა აზრზე... ბუნებრივია, ახლა თეორიული შანსი ყოველთვის არსებობს, ტაიმ-აუტის თხოვნა ვნახეთ, თუმცა ჩვენ როგორც ვხედავთ, მიმდინარეობს, ამავე ტაიმ-აუტის ფონზე მიმდინარეობს აი ეს ქმედებები, ანუ გარიცხვა ჩვენი თანამებრძოლებისა პარტიის სიიდან, ასევე ნიკა მელიას დაბარება წერილობით ფრაქციის სხდომაზე, რაღაც ამხანაგური სასამართლოს მოსაწყობად. რაც შეეხება კომპრომისის შესაძლებლობას, კიდევ ერთხელ გეუბნებით, რომ ყველა ეტაპზე ამ კონფლიქტის საჯაროდ, საჯარო სფეროში გამოსვლიდან, პარტიის უმრავლესობის წარმომადგენელი ჯგუფი ცდილობდა კომპორმისის მიღწევას ყველა ეტაპზე და ეს კომპრომისი იქნა უგულვებელყოფილი და უარყოფილი. ბუნებრივია, ჩვენ კომპრომისისთვის მზად ვართ, თუმცა ეს კომპრომისი ვერ იქნება ჩვენი ამომრჩევლების ხარჯზე, ჩვენი მხარდამჭერების ხარჯზე და ჩვენი პრინციპების ხარჯზე“, - განაცხადა ზაზა ბიბილაშვილმა.

ნინო კალანდაძემ დღეს განაცხადა, რომ „გიგი უგულავა წარმოადგენს უკვე იმ ჯგუფს, რომელმაც მთელი ეს რიგი ნაბიჯები გადადგა იმისათვის, რომ პარტია რეალურად ჩიხში შესულიყო“.

„გიგი უგულავა წარმოადგენს იმ ჯგუფს, რომელსაც არ აქვს პარტიაში მხარდაჭერა და რომელმაც თავისი თანაპარტიელები ამორიცხა სიიდან და რომელიც ნიკა მელიას უპირებს ორშაბათს ფრაქციიდან გარიცხვას. ამიტომ, ცხადია, ჩვენ შეგვიძლია ყველაფერზე ვისაუბროთ, მაგრამ მე განსაკუთრებულად დიდ შანსებს ვერ ვხედავ იმისა, რომ რაიმეს სახის მოლაპარაკება ამ ფორმატში შედგეს, მაშინ მან მკაფიოდ უნდა დააფიქსიროს პოზიცია იმის თაობაზე, რომ ეს არ არის მისი პოზიცია, რაც ასე არ არის, იმიტომ, რომ გიგი უგულავა არის იმ მთავარი წერილის ავტორი, რომელმაც საბოლოო ჯამში განაპირობა ეს საჯარო დისკუსია და პარტიული დაპირისპირების საჯაროობა“, - განაცხადა ნინო კალანდაძემ, რომელიც „ნაციონალურ მოძრაობაში“ საქართველოს ყოფილი პრეზიდენტის, მიხეილ სააკაშვილის მხარდამჭერთა ბანაკში იმყოფება.