FBI-ის ხელმძღვანელმა ჯეიმს კომიმ საჯაროდ უარყო „რესპუბლიკელების“ მტკიცება, რომ შეერთებული შტატების ყოფილი პრეზიდენტი ბარაქ ობამა აწარმოებდა დონალდ ტრამპის 2016 წლის საარჩევნო კამპანიის მოსმენებს და დაადასტურა ინფორმაცია იმის თაობაზე, რომ ფედერალურმა საგამოძიებო ბიურომ დაიწყო სისხლის სამართლის გამოძიება ტრამპის კამპანიასა და რუსეთს შორის ნებისმიერი ფარული შეთანხმების შესახებ.

„როიტერსი“-ს ცნობით, ფედერალური საგამოძიებო ბიუროს დირექტორმა, ჯეიმს კომიმ კონგრესში გამართული მოსმენებისას ამერიკელ კანონმდებლებს უთხრა, რომ მას არ გააჩნია სამხილი მხარი დაუჭიროს ტრამპის მტკიცებას, რომ ობამა ახორციელებდა მოსმენებს მისი კამპანიის შტაბ-ბინებში, ნიუ იორკში მდებარე „ტრამპ თაუერში“.

მარტის დასაწყისში ტრამპმა „თვითერზე“ სამხილის არქონის გარეშე დაწერა, რომ ობამა, მას შემდეგ რაც მან „დემოკრატების“ კანდიდატ ჰილარი კლინტონს საპრეზიდენტო მარათონში გადაასწრო, მის საარჩევნო კამპანიას უსმენდა.

„პრეზიდენტის თვითერზე გაცხადებულისადმი პატივისცემით, რომელიც წინა ადმინისტრაციის მიერ მის მიმართ თითქოსდა მოსმენებს ეხება, მე არ მაქვს ინფორმაცია, რომელიც გაამყარებს თვითერზე გაკეთებულ ამ განცხადებებს“, უთხრა კომიმ კონგრესის სადაზვერვო კომიტეტს მოსმენებისას და დაამატა:

„და ჩვენ FBI-ის შიგნით დიდი სიფრთხილით მოვეკიდეთ საკითხს. იუსტიციის დეპარტამენტმა მთხოვა მე მოგახსენოთ თქვენ, რომ იუსტიციის დეპარტამენტის და ყველა მისი შემადგენლობის პასუხი იგივეა: დეპარტამენტს არ გააჩნია ინფორმაცია, რომელიც მხარს დაუჭერს თვითერზე გაკეთებულ ამ განცხადებებს“.