ამერიკის შეერთებული შტატების პრეზიდენტმა, დონალდ ტრამპმა ჩრდილოეთ კორეის ლიდერთან, კიმ ჩენ ინთან შეხვედრის მზადყოფნა გამოხატა და თქვა, რომ ეს მისთვის „პატივი“ იქნებოდა.

„თუკი ეს ხელსაყრელი იქნება ჩემთვის, რომ შევხვდე მას, მე უდაოდ გავაკეთებდი ამას“, განაცხადა ტრამპმა ოვალურ ოფისში „ბლუმბერგის“ ახალ ამბებთან ინტერვიუში.

შეერთებულ შტატებს ჩრდილოეთ კორეასთან დიპლომატიური ურთიერთობები არ გააჩნია, და გასული კვირის ბოლოს სახელმწიფო მდივანმა რექს ტილერსონმა გაერთიანებული ერების ორგანიზაციის უშიშროების საბჭოზე განაცხადა, რომ შეერთებული შტატები მოლაპარაკებებს აწარმოებს კიმის რეჟიმთან, თუკი ის დამაჯერებელ ნაბიჯებს გადადგამს მისი ბირთვული და ბალისტიკური სარაკეტო პროგრამების უარის თქმის მიმართულებით.

„უმეტესი პოლიტიკოსი არასოდეს იტყოდა ამას“, თქვა ტრამპმა მის სურვილთან დაკავშირებით, შეხვდეს კარჩაკეტილ კიმ ჩენ ინს, „მაგრამ მე გეუბნებით თქვენ, რომ განსაკუთრებულად მართებულ სიტუაციაში მე მას შევხვდებოდი. ჩვენ გვაქვს სასწრაფო ახალი ამბავი“.

კიმ ჩენ ინი, 2011 წლის მერე, როდესაც იგი მამამისის გარდაცვალების შემდეგ ჩრდილოეთ კორეის მმართველი გახდა, არ შეხვედრია არც ერთ უცხოელ ლიდერს და არასდროს დაუტოვებია მისი იზოლირებული ქვეყანა.

ყოფილი სახელმწიფო მდივანი მადლენ ოლბრაიტი აშშ-ის ბოლო მაღალი დონის ოფიციალური პირი იყო, რომელიც ჩრდილოეთ კორეის მაშინდელ ლიდერს, კიმ ჩენ ირს 2000 წელს შეხვდა და მასთან ბირთვული პროგრამის საკითხები განიხილა. ოლბრაიტი აშშ-ის ყველაზე მაღალი რანგის სახელმწიფო მოღვაწე იყო, რომელიც ჩრდილოეთ კორეასთან ომიდან 50 წლის შემდეგ ფხენიანს ესტუმრა.

ამერიკის შეერთებულ შტატებსა და ჩრდილოეთ კორეას შორის დაძაბულობის ფონზე პრეზიდენტმა დონალდ ტრამპმა კვირას, CBS-სთან ინტერვიუში განაცხადა, რომ ჩრდილოეთ კორეის ლიდერი კიმ ჩენ ინი „საკმაოდ ჭკვიანია“, რადგან შეძლო ძალაუფლების შენარჩუნება, რომელიც მან საკმაოდ ახალგაზრდა ასაკში აიღო.

„ხალხი კითხულობს, ის საღად აზროვნებს?“ თქვა ტრამპმა CBS-სთან საუბრისას და განაგრძო: „ვერაფერს ვიტყვი. მე ვერ გეტყვით ამას. ბევრ ადამიანს არ მოსწონს, როცა მე ამას ვამბობ, მაგრამ ის იყო ახალგაზრდა კაცი, 26 თუ 27 წლის, როდესაც ძალაუფლება აიღო ხელში, როცა მამამისი გარდაიცვალა. მას, აშკარაა, რომ ძალიან მაგარ ხალხთან აქვს საქმე, განსაკუთრებით გენერლებთან და სხვებთან და ძალიან ახალგაზრდა ასაკში მან შეძლო ძალაუფლების ხელში აღება და განმტკიცება. ბევრი ადამიანი, დარწმუნებული ვარ, ცდილობდა მისი ამ ძალაუფლებიდან ჩამოცილებას, იქნებოდა ეს მისი ბიძა თუ სხვა ვინმე. და მან ეს შეძლო და ამგვარად, ნათელია, რომ ის საკმაოდ ჭკვიანი ვინმეა. მაგრამ ჩვენ გვაქვს სიტუაცია, რომელსაც ვერ დავუშვებთ, ვერ დავუშვებთ იმას, რაც დიდი ხნის განმავლობაში გრძელდებოდა და გულახდილად რომ ითქვას, ამაზე უნდა ეზრუნა ობამას ადმინისტრაციას, ბუშის ადმინისტრაციას, კლინტონს“, განაცხადა ტრამპმა, რომლის ამერიკულ ტელეარხთან ინტერვიუმდე რამდენიმე საათით ადრე ჩრდილოეთ კორეამ მორიგი ბალისტიკური რაკეტა გამოსცადა, რითაც უგულვებელყო ამერიკის შეერთებული შტატების და ჩინეთის - კარჩაკეტილი ქვეყნის მთავარი დიპლომატიური მოკავშირის - გაფრთხილებები, შეაჩეროს ბირთვული და სარაკეტო პროგრამები.

სამხრეთ კორეის და შეერთებული შტატების ოფიციალური პირების თქმით, ფხენიანის ბოლო სარაკეტო გამოცდა წარუმატებელი აღმოჩნდა, რაც მარტის შემდეგ ჩრდილოეთ კორეის უკვე ოთხი ერთმანეთზე მიყოლებული წარუმატებელი სარაკეტო გამოცდაა.

სარაკეტო გამოცდა ფხენიანმა შაბათს, იმ დროს მოაწყო, როცა შეერთებული შტატების სახელმწიფო მდივანმა რექს ტილერსონმა გააფრთხილა გაერთიანებული ერების ორგანიზაციის უშიშროების საბჭო, რომ ჩრდილოეთ კორეის ბირთვული და სარაკეტო პროგრამების შეჩერების წარუმატებლობა შესაძლოა, „კატასტროფული შედეგების“ გამომწვევი აღმოჩნდეს.

„მხოლოდ დროის საკითხია, რომ ჩრდილოეთ კორეამ განავითაროს მისი შესაძლებლობა, დარტყმა მიაყენოს შეერთებული შტატების კონტინენტს“, განაცხადა ტილერსონმა და დაამატა, რომ აშშ საჭიროების შემთხვევაში სამხედრო ძალას გამოიყენებს.

როგორც ტრამპმა CBS-ს უთხრა, „ისინი შესაძლოა, უბრალოდ კარგი რაკეტები არაა, მაგრამ ბოლოს და ბოლოს მას [კიმ ჩენ ინს] ექნება კარგი რაკეტები“.

ჩრდილოეთ კორეაზე დარტყმის შესახებ დასმული შეკითხვა კი პრეზიდენტმა ღიად დატოვა.

„ჩვენ არ უნდა ვაცხადებდეთ ყველა ჩვენი ნაბიჯის შესახებ. ეს ჭადრაკის თამაშია. მე არ მინდა ხალხმა იცოდეს, თუ რა არის ჩემი ფიქრები. ამვარად, მას ბოლოს და ბოლოს ექნება უკეთესი გადაცემის სისტემა და თუ ეს მოხდება, ჩვენ არ დავუშვებთ, რომ ეს მოხდეს“, განაცხადა სატელევიზიო ინტერვიუში დონალდ ტრამპმა, რომელმაც ხუთშაბათს, „როიტერსისთვის“ მიცემულ ინტერვიუში არ გამორიცხა, რომ შეერთებულ შტატებსა და ჩრდილოეთ კორეას შორის დაძაბული ურთიერთობა „დიდ, დიდ კონფლიქტამდე მივიდეს“.

აღნიშნულის პერსპექტივით კი შეშფოთებულია რომის პაპი, რომელმაც შეერთებულ შტატებსა და ჩრდილოეთ კორეას შორის ფხენიანის ბირთვული და სარაკეტო პროგრამების გამო არსებული დაძაბულობის შესანელებლად საერთაშორისო შუამავლობის საჭიროების მოწოდება გააკეთა და გამაფრთხილებლად თქვა, რომ კრიზისი გამანადგურებელი ომის რისკის შემცველია, რომელშიც „კაცობრიობის დიდი ნაწილი“ მოისპობა.

ჩინეთი კი - ჩრდილოეთ კორეის ერთადერთი ყველაზე მთავარი დიპლომატიური მოკავშირე - შიშობს, რომ „კონფლიქტმა შესაძლოა ნებისმიერ მომენტში იფეთქოს“, რადგან დაძაბულობა ჩრდილო კორეის გარშემო იზრდება.