ზბიგნევ ბჟეზინსკი, პრეზიდენტ ჯიმი კარტერის ეროვნული უსაფრთხოების მრჩეველი, 89 წლის ასაკში პარასკევ საღამოს ვირჯინიაში გარდაიცვალა.

ინფორმაცია სოციალური ქსელით მისმა შვილმა, მიკამ გაავრცელა.

აშშ-ის ყოფილმა პრეზიდენტმა, ჯიმი კარტერმა ოჯახს სამძიმარი გამოუცხადა და მის ყოფილ მრჩეველს „ჩინებული საზოგადო მოღვაწე“ უწოდა.

თეთრი სახლის დატოვების შემდეგ ის დიდი ხნის განმავლობაში აკადემიურ საქმიანობას ეწეოდა. მან იმთავითვე მხარადაჭერა გამოუცხადა ბარაქ ობამას და მისი შემცვლელის, დონალდ ტრამპის ერთ-ერთი მთავარი კრიტიკოსი იყო.

მისი ერთ-ერთი ბოლო განცხადება „თვითერზე“, რომელიც თებერვალში გააკეთა, შენიშნავდა: „გაგვაჩნია კი საერთოდ საგარეო პოლიტიკა ახლა?“

პოლონელი დიპლომატის „ცოდნისმოყვარე და ინოვაციებისაკენ მიდრეკილი“ ვაჟი, ბჟეზინსკი, უსაფრთხოების მრჩევლად „ბუნებრივი არჩევანი“ იყო, ნათქვამია კარტერის სამძიმრის განცხადებაში.

„მან არსებითი როლი ითამაშა ჩემ ადმინისტრაციაში საგარეო პოლიტიკის ყველა მნიშვნელოვან ღონისძიებაში, მათ შორის ჩინეთთან ურთიერთობების ნორმალიზებაში, SALT II ხელშეკრულების [შეიარაღების კონტროლზე], კემპ დევიდის შეთანხმებების შუამავლობის [ახლო აღმოსავლეთის მშვიდობაზე], და პანამის არხის ხელშეკრულებების, ისევე როგორც სხვა საკითხების მიღწევაში“, წერს კარტერი.

„იგი იყო ბრწყინვალე, თავდადებული და ერთგული და დარჩა ჩემ ახლო მრჩევლად კარტერის ცენტრში. მე მომენატრება იგი“.