დიდი ბრიტანეთის პრემიერ მინისტრის, ტერეზა მეის ლიდერობა ოპოზიციურ „ლეიბორისტულ პარტიაზე“ მკვეთრად შემცირდა. ამის შესახებ „როიტერსი“ სოციოლოგიურ გამოკითხვებზე დაყრდნობით წერს, რომელიც მანჩესტერში განხორციელებული ტერორისტული თავდასხმის შემდეგ გამოქვეყნდა, რაც იმაზე მიანიშნებს, რომ პოლიტიკური პროცესები უწინდელი პროგნოზით შეიძლება არ განვითარდეს და მან დიდი უპირატესობით ვერ შეძლოს გამარჯვება 8 ივნისის რიგგარეშე საპარლამენტო არჩევნებში, რომლის დანიშვნის გადაწყვეტილებაც თავად მეიმ მიიღო.

შაბათს გამოქვეყნებულმა წინასწარმა კვლევებმა აჩვენა, რომ პრემიერ მინისტრის ლიდერობა 2-იდან 6 პროცენტით შემცირდა, რაც იმაზე მიანიშნებს რომ 8 ივნისის არჩევნები გაცილებით დაძაბული იქნება, ვიდრე ამას მეი თავდაპირველად, რიგგარეშე არჩევნების გამოცხადებისას ფიქრობდა.

„ტერეზა მეი, უეჭველია, რომ უძლეველი ფავორიტია გამარჯვების გზაზე, მაგრამ ჩვენ გადამწყვეტად ვიმყოფებით ახლა იმ ტერიტორიაზე, სადაც რამდენად კარგად გაიმარჯვებს ის, გაურკვეველია“, უთხრა „როიტერსს“ შოტლანდიური Strathclyde-ის უნივერსიტეტის პოლიტიკის მეცნიერებათა პროფესორმა, ჯონ კერტისმა.

„მას უკვე აღარ აქვს იმის გარანტია, რომ აბსოლუტური უმრავლესობა მიიღოს, რასაც იგი თავდაპირველად ფიქრობდა, რომ მიიღებდა“, თქვა კერტისმა.

მეიმ რიგგარეშე არჩევნები ევროკავშირთან „ბრექსიტის“ მოლაპარაკებების უფრო მტკიცედ წარმართვის მოტივით დანიშნა, მაგრამ თუ კი იგი ვერ მოხსნის მისი წინამორბედის, დევიდ ქამერონის 2015 წლის არჩევნებისას 12-კაციანი უპირატესობით შექმნილ უმრავლესობის რეკორდს, მაშინ მისი ხელისუფლება შეიძლება წარუმატებელი აღმოჩნდეს იმ დროს, როცა იგი „ბრექსიტის“ ოფიციალურ მოლაპარაკებებს დაიწყებს ევროკავშირთან.

მას შემდეგ რაც წინასწარი სოციოლოგიური კვლევები გამოქვეყნდა, სადაც მეის რეიტინგი 5 პროცენტითაა დაცემული, ფუნტი სტერლინგი პარასკევს, იანვრის შემდეგ ყველაზე დაბალ ნიშნულზე ჩამოვიდა წამყვან უცხოურ ვალუტებთან მიმართებაში.

თუმცა ერთ-ერთი ორგანიზაციის კვლევის თანახმად, მეი უწინდელ 14%-იან უპირატესობას ინარჩუნებს.