ცენტრალურ ლონდონში, ლონდონის ხიდზე ფეხით მოსიარულეებს ავტომანქანა დაეჯახა. თვითმხილველებმა განაცხადეს, რომ შეიარაღებული პოლიციელები ხიდზე იმყოფებიან მას შემდეგ, რაც თეთრი ფერის ფურგონი ტროტუარზე შევარდა.

როგორც BBC სატრანსპორტო პოლიციაზე დაყრდნობით იუწყება, ადგილი აქვს სამ სხვადასხვა ინციდენტს. გავრცელებული ცნობით, დანით შეიარაღებული პირის ჩართულობის შედეგად სულ მცირე 1 ადამიანია გარდაცვლილი და არიან დაჭრილები. 

დიდი ბრიტანეთის პრემიერ მინისტრი ახლა დაუნინგ სტრიტისკენ მიემართება, რომ მიიღოს შემდგომი ინფორმაციები უსაფრთხოების სამსახურებისაგან. 

BBC იუწყება, რომ თავდამსხმელები გრძელი დანებით ახორციელებდნენ ადამიანებზე თავდასხმას. იმ ტეროტორიაზე, სადაც თავდასხმა მოხდა, დაცვის სამსახურის თანამშრომელმა, რომელიც რამდენიმე ლუდხანის (ე.წ. პაბი) ზედამხედველობას ახდენდა, განაცხადა, რომ ინციდენტისას ყველა გარბოდა და გაჰყვიროდა.  

BBC-ის ცნობით, დედაქალაქის პოლიციამ განაცხადა, რომ ისინი მომხდარ ინციდენტებს იკვლევენ.

ლონდონის სატრანსპორტო კომპანიამ განაცხადა, რომ ხიდი ორივე მიმართულებით გადაიკეტა და ავტობუსის მარშრუტები სხვადასხვა მიმართულებით გადამისამართდა.

BBC-ის რეპორტიორმა ჰოლი ჯონსმა, რომელიც ინციდენტის დროს ხიდზე იმყოფებოდა, განაცხადა რომ მამაკაცმა ფურგონი ხიდზე „დაახლოებით 50 მილი საათში სიჩქარით შეიყვანა“.

მისი თქმით, ხუთმა ადამიანმა მიიღო დაზიანება მას შემდეგ, რაც ავტოსატრანსპორტო საშუალება ტროტუარზე ავარდა.

ლონდონის სასწრაფო დახმარების სამსახურმა „თვითერზე“ დაწერა: „რამდენიმე ჯგუფია გასული ლონდონის ხიდზე, გთხოვთ, მოერიდოთ მიმდებარე ტერიტორიას“.