FBI-ს ყოფილმა დირექტორმა, ჯეიმს კომიმ ხუთშაბათს ბრალი დასდო პრეზიდენტ დონალდ ტრამპს მისი სამსახურიდან იმ მოტივით დათხოვნაში, რომ ძირი გამოეთხარა ბიუროს იმ გამოძიებისთვის, რომელიც ტრამპის საარჩევნო კამპანიასა და რუსეთს შორის შესაძლო საიდუმლო შეთანხმებას უკავშირდებოდა.

შეერთებული შტატების კონგრესში გამართული მოსმენებისას, კომიმ უთხრა კანონმდებლებს, რომ ტრამპის ადმინისტრაციამ მოატყუა და სახელი გაუტეხა მას და FBI-ს მას შემდეგ, რაც პრეზიდენტმა იგი 9 მაისს თანამდებობიდან გაათავისუფლა.

ახალი ამბების სააგენტო „როიტერსის“ ცნობით, 2 საათზე მეტი ხნის განმავლობაში ჩვენების მიცემისას, კომიმ სენატის სადაზვერვო კომიტეტს უთხრა, რომ მას სჯეროდა, რომ ტრამპმა მიზანში ამოიღო იგი, რომ შეეწყვიტა FBI-ს გამოძიება „რესპუბლიკელი“ პრეზიდენტის ეროვნული უსაფრთხოების ყოფილ მრჩეველთან, მაიკლ ფლინთან დაკავშირებით, როგორც უფრო ფართო რუსული საქმის გამოძიების ნაწილი.

მიუხედავად ამისა, როგორც ამას „როიტერსი“ წერს, კომის ტრამპსა თუ მის საარჩევნო გუნდსა და რუსეთს შორის სავარაუდო კავშირების შესახებ რაიმე ახალი ამბავი არ გაუმჟღავნებია.

შეკითხვაზე, რატომ დაითხოვა ტრამპმა იგი, კომიმ განაცხადა, რომ მან დარწმუნებით არ იცის ამის მიზეზი, მაგრამ დაამატა: „კვლავ, მე ვიღებ პრეზიდენტის სიტყვებს. მე ვიცი, იმიტომ ვიქენი დათხოვნილი, რომ რუსეთის გამოძიება, რომელსაც მე ვაწარმოებდი, გარკვეულწილად მასზე ახდენდა ზეწოლას, გარკვეულად აღიზიანებდა მას, და ამის გამო მან ჩემი გათავისუფლება გადაწყვიტა“.

მაგრამ კომის არ უთქვამს, ფიქრობდა თუ არა იგი, რომ პრეზიდენტი ცდილობდა სიმართლის დადგენისთვის ხელის შეშლას, მაგრამ მან ნამდვილად თქვა, რომ ფლინი FBI-ს გამოძიებით, „სისიხლის სამართლის პასუხისმგებლობის დაყენების რისკის კანონიერი საფრთხის ქვეშ“ იყო, წერს „როიტერსი“.

„მე არ ვფიქრობ, რომ საუბარი, რომელიც მე მქონდა პრეზიდენტთან, ხელის შეშლის მცდელობა იყო. მე მივიღე ის, როგორც ძალიან შემაშფოთებელი რამ, ძალიან შემაშფოთებელი“, უთხრა კომიმ კომიტეტს.

ტრამპის კრიტიკოსები აცხადებენ, რომ პრეზიდენტის მიერ ნებისმიერი მცდელობა, ხელი შეუშალოს FBI -ს გამოძიებას, სამართლიანობის აღსრულების ხელისშემშლელი იქნება. ამგვარმა დანაშაულებრივმა ქმედებამ შესაძლოა პოტენციურად ტრამპის კონგრესის მიერ იმპიჩმენტისკენ წაიყვანოს საქმე, თუმცა, როგორც ამას „როიტერსი“ წერს, „რესპუბლიკელებმა“, რომლებიც აკონტროლებენ როგორც სენატს, ისე წარმომადგენლობით პალატას, ამგვარი ნაბიჯის გადადგმისკენ მცირე ლტოლვა აჩვენეს.

მხარდამჭერების წინაშე სიტყვით გამოსვლისას ტრამპმა ბრძოლის გაგრძელების აღთქმა დადო. „ჩვენ ალყაში ვიმყოფებით... მაგრამ ჩვენ აქედან გამოვალთ უფრო მძლავრი, უფრო დიდი და უფრო უკეთესი, ვიდრე ოდესმე“, თქვა მან.

„ჩვენ ვიცით, როგორ უნდა ვიბრძოლოთ და ჩვენ არასოდეს დავნებდებით“, დაამატა პრეზიდენტმა.

ტრამპის პირადმა ადვოკატმა, მარკ კასოვიჩმა განაცხადა, რომ კომის მიერ ჩვენების მიცემამ დაამტკიცა, რომ პრეზიდენტი არ ყოფილა რაიმე გამოძიების ქვეშ და არ არსებობს სამხილი, რომ რუსეთის გასული წლის არჩევნებში ჩარევის შედეგად ერთ ხმაც კი შეცვლილიყო.

კასოვიჩმა უარყო, რომ ტრამპს ოდესმე ეთქვას, რომ მას სჭირდებოდა და მოელოდა მისგან ერთგულებას, როგორც ეს კომიმ თქვა.