„ტორები“ პარლამენტში ყველაზე დიდი პარტია იქნება, მაგრამ მას შესაძლოა არ ჰყავდეს უმრავლესობა. ინფორმაციას დიდი ბრიტანეთის რიგგარეშე საპარლამენტო არჩევნების დასრულების შემდეგ BBC ეგზიტ პოლზე დაყრდნობით ავრცელებს.

NOP/Ipsos MORI, BBC/ITV/Sky-სთვის ჩატარებული გამოკითხვა, რომელიც მთელი ბრიტანეთის მასშტაბით ჩატარდა საარჩევნო უბნებზე, ირწმუნება, რომ ხმების სრულად დათვლის შემდეგ „კონსერვატიულმა პარტიამ“ შესაძლოა 314 დეპუტატი გაიყვანოს თემთა პალატაში, „ლეიბორისტებმა“ შესაძლოა 266 ადგილი მიიღონ, „ლიბერალ-დემოკრატებმა“ 14, „დიდი ბრიტანეთის დამოუკიდებელმა პარტიამ“ ვერც ერთი, „შოტლანდიის ეროვნულმა პარტიამ“ 34.

მოელიან, რომ არჩევნების პირველადი შედეგები შუაღამისას გამოცხადდება, ხოლო საბოლოო შედეგები პარასკევს, შუადღისთვის გახდება ცნობილი.

ხუთშაბათს, 8 ივნისს, დიდ ბრიტანეთში რიგგარეშე საპარლამენტო არჩევნები გაიმართა. ქვეყნის მასშტაბით 40 000-ზე მეტი საარჩევნო უბანი იყო დარეგისტრირებული, რომლებიც ბრიტანეთის დროით დილის 07:00 საათზე გაიხსნა, ხმის მიცემა კი 22:00 საათზე დასრულდა.

როგორც BBC იუწყება, საარჩევნო რეგისტრაცია გაიარა დაახლოებით 46.9 მილიონმა ამომრჩეველმა, რომელიც საერთო ჯამში 650 დეპუტატს აირჩევს. ბოლო საპარლამენტო არჩევნებში, 2015 წელს, 46.4 ამომრჩეველი იყო დარეგისტრირებული.

ზოგიერთმა ამომრჩეველმა ხმა ფოსტის მეშვეობით მისცა. მათმა რაოდენობამ 2015 წლის არჩევნებში საერთო ელექტორატის 16.4% შეადგინა.

2015 წლის არჩევნებში, როცა „კონსერვატორებმა“ 650 ადგილიდან 331 მოიპოვეს, მონაწილეთა საერთო რაოდენობა 66.4% იყო, უფრო მაღალი ვიდრე 2010 წელს.

BBC-ის ცნობით, საარჩევნო უბნების უმრავლესობა სკოლებში, საზოგადოებრივ ცენტრებში, საეკლესიო დარბაზებშია განლაგებული, მაგრამ წარსულში ხმის მისაცემად ლუდხანები, სამრეცხაოები და სასკოლო ავტობუსებიც იყო გამოყენებული.

არაჩვეულებისამებრ, საპარლამენტო არჩევნების პარალელურად არ ჩატარებულა ადგილობრივი არჩევნები, ამგვარად არჩევნების შედეგები უფრო ადრე შეიძლება გახდეს ცნობილი, ვიდრე ამას ბოლო საპარლამენტო არჩევნების დროს ჰქონდა ადგილი.

თემთა პალატაში უმრავლესობის ფორმირებისთვის ერთმა პარტიამ 326 ადგილი უნდა მოიპოვოს - 2015 წელს „კონსერვატორთა“ უმრავლესობა 13:34 საათამდე არ დადასტურებულა. დევიდ ქამერონის ხელმძღვანელობით 2015-ში „ტორებმა“ 331 ადგილი მოიპოვეს, რაც 5-ით აღემატებოდა უმრავლესობის ჩამოსაყალიბებლად საჭირო დეპუტატთა რაოდენობას.