სამაუწყებლო კომპანია „რუსთავი 2“-ის აქციების საკონტროლო პაკეტის მფლობელები, ძმები გია და ლევან ყარამანაშვილები ტელეკომპანიის გარშემო შექმნილ ვითარებასთან დაკავშირებით განცხადებას ავრცელებენ, რომელშიც უარყოფენ გავრცელებულ ინფორმაციას იმასთან დაკავშირებით, რომ „თითქოს, ტელეკომპანიის დამფუძნებლებმა თანამდებობიდან გაათავისუფლეს ნიკა გვარამია“ და აღნიშნულს „მიზანმიმართულ სიცრუეს“ უწოდებენ.

„სინამდვილეში, თათბირზე, რომელიც შეეხებოდა ტელეკომპანიაში დაგროვილ ფინანსურ პრობლემებს, ნიკა გვარამიამ თავად განაცხადა, რომ ტოვებდა თანამდებობას, რასაც დამსწრე დამფუძნებლის წინააღმდეგობა არ მოჰყოლია, როგორც არსებული ემოციური ფონის, ასევე იმის გამო, რომ ნიკა გვარამია თავად განიხილავდა წასვლის შესაძლებლობას, რის შესახებაც ვიცოდით, როგორც ჩვენ, ასევე ტელეკომპანიის თანამშრომლებმა, რომელთა წინაშეც ეს საჯაროდ იქნა გაცხადებული რამდენიმე კვირის წინ. აღსანიშნავია, რომ თათბირი მოწვეულ იქნა არა დამფუძნებლების, არამედ თანამშრომლების მიერ, ხოლო გიორგი ყარამანიშვილი მასზე მივიდა თათბირის მონაწილეთა თხოვნით“, აცხადებენ ყარამანიშვილები და აზუსტებენ, რომ „ტელეკომპანიის გენერალურ დირექტორს გადადგომის შესახებ განცხადება ოფიციალურად არ გაუკეთებია“, და აქედან გამომდინარე აკეთებენ მინიშნებას, რომ „ნიკა გვარამიას ხვალვე შეუძლია, განაახლოს ტელეკომპანიაში თავისი უფლება-მოვალეობების შესრულება“.

„ნიკა გვარამიამ უდიდესი წვლილი შეიტანა საქართველოში დემოკრატიისა და გამოხატვის თავისუფლებისთვის მიმდინარე ბრძოლაში. მისი როლი ივანიშვილისგან რუსთავი2-ის დაცვაში ფასდაუდებელია“, აცხადებენ ყარამანიშვილები, რომლებიც ტელეკომპანიის ფინანსური კრიზისიდან გამოყვანის ეფექტურ გზად „მენეჯმენტის ხარჯების ოპტიმიზაციას“ მიიჩნევენ.

„ტელეკომპანიის კოლექტივს გვინდა, ვაცნობოთ, რომ რამდენიმე კვირის წინ დამფუძნებლები და გენერალური დირექტორი შეთანხმდნენ კომპანიის ფინანსური კრიზისიდან გამოყვანის ერთობლივ გეგმაზე. აუცილებელია ამ გეგმის განუხრელად შესრულება, მენეჯმენტის ხარჯების ოპტიმიზაციისა და კონტროლის გზით, რათა დაუყოვნებლივ განახლდეს ხელფასების გაცემა და კომპანიის მიმდინარე ვალდებულებების შესრულება“, ნათქვამია ყარამანაშვილების განცხადებაში.