„ლეიბორისტული პარტიის“ თავმჯდომარემ, შალვა ნათელაშვილმა განაცხადა, რომ რადიო „თავისუფლების“ ჟურნალისტის, აფგან მუხტარლის „გატაცება თბილისის ცენტრში, ივანიშვილ-ალიევის მაფიოზურ-კლანური ოჯახის წარმომადგენლებმა სახელმწიფო სტრუქტურების გამოყენებით“ დაგეგმეს, რამაც მისი თქმით, საფრთხის წინაშე დააყენა „საქართველოს ევროინტეგრაცია, უვიზო რეჟიმის ნორმალური განხორციელება“.

„აზერბაიჯანიდან პოლიტიკურად დევნილი ჟურნალისტის გატაცება, რაც განხორციელდა თბილისის ცენტრში, წარმოადგენს ადამიანობისა და ჰუმანურობის წინააღმდეგ ჩადენილ დანაშაულს. ეს მეკობრული აქტი დაგეგმეს ივანიშვილ-ალიევის მაფიოზურ-კლანური ოჯახის წარმომადგენლებმა სახელმწიფო სტრუქტურების გამოყენებით. აღნიშნულის გამო, საფრთხის წინაშე დადგა საქართველოს ევროინტეგრაცია, უვიზო რეჟიმის ნორმალური განხორციელება, ინვესტიციების შემოდინება, ეკონომიკის მდგრადობა, ეროვნული ვალუტის სიმყარე და მე მაქვს თხოვნა ევროპის კავშირთან, ევროპის ქვეყნების ლიდერებთან, აღნიშნულის გამო დასაჯონ არა საქართველო და ქართველი ხალხი, არამედ ქვეყნის კრიმინალი, დე-ფაქტო მმართველი ივანიშვილი, რომლის კრიმინალური მილიარდები, საბანკო ანგარიშებისა და აქციების სახით, განფენილია მთელი ევროპის ტერიტორიაზე და რომელმაც საკუთარ ბიზნესს, საკუთარ მილიარდებს ამჯერადაც გადააყოლა ქვეყნის, მისი თითოეული მოქალაქის, თითოეული ოჯახის ინტერესები, მათი მომავალი ბედნიერება და იმედები“, განაცხადა პარასკევს გამართულ ბრიფინგზე ნათელაშვილმა, რომელიც მიიჩნევს, რომ „კავკასიას დღეს მართავს ორი მაფიოზური ოჯახი - ალიევის და ივანიშვილის“.

„არავისთვის დასამალი არ გახლავთ, რომ კავკასიას დღეს მართავს ორი მაფიოზური ოჯახი - ალიევის და ივანიშვილის. საერთოდაც, მსოფლიოს მართავს ის, ვინც ფლობს ენერგორესურსებს, ნავთობსა და გაზს. ორივე ოჯახი, ქართველი და აზერბაიჯანელი ხალხის ხარჯზე მდიდრდება და ალბათ, ვერავინ მეტყვის, სად მიდის საქართველოზე გამავალი ბაქო-სუფსის, ბაქო-ბათუმის ნავთობსადენებიდან შემოსული თანხა, სად მიემართება შაჰ-დენიზის თანხა, რომელიც საქართველოზე გადის, საით მიდის ბაქო-ჯეიჰანის მილიარდები, რომელიც ასევე ჩვენი ტერიტორიის გათხრის შედეგად მიემართება მთელ მსოფლიოში. ასევე არავინ იცის, სად ორთქლდება ასეულობით მილიონი დოლარი ტრანზიტის მიზნით საქართველოს ტერიტორიიის გამოყენებისა - აზერბაიჯანის, შუა აზიის მიმართულებით, რამაც ჩვენი ქვეყნის ეკოლოგია გაანადგურა და ხალხის ჯანმრთელობას შეუქმნა საფრთხე“, განაცხადა შალვა ნათელაშვილმა.