მამაკაცი, რომელიც ლონდონში, Finsbury Park -თან ტერორისტული აქტის განხორციელებაში ეჭვმიტანილის სახით არის დაკავებული, ქალაქ კარდიფის მკვიდრი, 47 წლის დარენ ოზბორნია. ამის შესახებ BBC იუწყება.

იგი მას შემდეგ აიყვანეს, რაც ჩრდილოეთ ლონდონში, საღამოს ლოცვების შემდეგ მეჩეთიდან გამოსულ მუსულმანებს ფურგონი დაატაკა. გარდაიცვალა 1 მამაკაცი და დაშავდა 10 ადამიანი, თუმცა ჯერჯერობით უცნობია, გარდაცვლილი მამაკაცი, რომელიც ჯერ დაეცა და უგონო მდგომარეობაში აღმოჩნდა, მოგვიანებით კი გარდაიცვალა, იყო თუ არა თავდასხმის მსხვერპლი.

ოზბორნი პოლიციამ მკვლელობის მცდელობის და ტერორსიტული დანაშაულობების ბრალდებით დააკავა. BBC-ის ინფორმაციით, პოლიცია კარდიფში, მის საცხოვრებელ სახლში ჩხრეკას ატარებს.

უსაფრთხეობის მინისტრმა, ბენ უალასმა განაცხადა, რომ ეჭვმიტანილის ვინაობა უსაფრთხოების სამსახურებისთვის ცნობილი არ ყოფილა და სარწმუნოა, რომ იგი მარტო მოქმედებდა. იგი სამერსეტში გაიზარდა და 4 შვილი ჰყავს.

ჩრდილოეთ ლონდონში, Finsbury Park-თან Seven Sisters Road-ზე მდებარე მეჩეთთან ახლოს ფურგონის ფეხით მოსიარულეებთან შეჯახება, რასაც პოლიციამ „დიდი ინციდენტი“ უწოდა, კვირა ღამით მოხდა.

ლონდონის პოლიციის განცხადებით, ოფიცრები ადგილობრივი დროით 00:20 საათზე გამოიძახეს და ისინი ინციდენტის ადგილას დიდი ხნის განმავლობაში იმყოფებოდნენ.

ბრიტანეთის მუსლიმთა საბჭომ განაცხადა, რომ ფურგონმა „განზრახ“ გადაუარა ღვთისმსახურებს.

BBC-ის ცნობით, დაშავებულთაგან ბევრი საღამოს ლოცვიდან სულ ახალი გამოსული იყო.

ლონდონის სასწრაფო-სამედიცინო დახმარების სამსახურის თქმით, მათ შემთხვევის ადგილას „რამდენიმე რესურსი“ გააგზავნეს.

ვიდეოში, რომელიც ინციდენტიდან მალევე გამოქვეყნდა, ჩანს თუ როგორი ქაოსია და როგორ ცდილობენ ადამიანები დაზარალებულთა დახმარებას.