2017 წლის ადგილობრივი თვითმმართველობის არჩევნებში მონაწილეობის სურვილს გამოხატავს ადიგენის მუნიციპალიტეტის გამგებელი ზაქარია ენდელაძე. იგი ამბობს, რომ „ქართული ოცნება - დემოკრატიული საქართველოს“ მიერ მისი წარდგენის შემთხვევაში თანახმა იქნება ისევ გამგებლის პოსტზე იყაროს კენჭი და თუ მმართველი პარტია სხვა კანდიდატურის დასახელების გადაწყვეტილებას მიიღებს, მაშინ იგი თავის პროფესიულ საქმიანობას დაუბრუნდება.

„თვითმმართველობის არჩევნებში მონაწილეობას ვაპირებ, თუმცა, ჯერ მოვლენებს არ გავასწრებ, ამას ჩემი პოლიტიკური ხელმძღვანელობა გადაწყვეტს. რა გადაწყვეტილებასაც მიიღებს ჩემი პოლიტიკური ხელმძღვანელობა, ჩემთვის იქნება უნიკალური ის. წარდგენის შემთხვევაში ვიქნები თანახმა, ვიყარო კენჭი ისევ გამგებლის პოსტზე. თუ ჩემი წარდგენა აღარ მოხდება, მე მაქვს ჩემი პროფესია, იურისტი ვარ, ადვოკატი და განვაგრძობ ჩემს საქმიანობას.

„ჩვენი საქმიანობა იყო ნაყოფიერი და ძალიან ნაყოფიერი, თუმცა, ეს არ ნიშნავს იმას, რომ კმაყოფილები ვართ, რომ ყველაფერი გავაკეთეთ. გაგვაჩნია უკმაყოფილების გრძნობაც და ვფიქრობ, რომ ეს არის კარგი სამომავლო პერსპექტივაში იმიტომ, რომ ზოგადად, ხელმძღვანელი და მით უმეტეს, მუნიციპალიტეტის პირველი პირი არ უნდა იყოს ყველაფრით კმაყოფილი. მე ამას ზოგადად გეუბნებით და არა ტრაფარეტულად. მე ბუნებით ვარ ასეთი, ეს ჩემი ცხოვრების წესი და ტიპური მანერაა, რომ არასდროს არ ვარ კმაყოფილი ჩემით, სულ ახლის ძიებაში ვარ“, უთხრა Guardian.ge-ს ენდელაძემ.