საქართველოს ყოფილი პრეზიდენტის, ოდესის ოლქის ყოფილი გუბერნატორის, მიხეილ სააკაშვილის თქმით, მიუხედავად იმისა, რომ მოქალაქეობასთან დაკავშირებით რამდენიმე ევროპული ქვეყნისგან შემოთავაზება მიიღო, არ აპირებს უკრაინაში განვითარებულ მოვლენებს „შორიდან უყუროს“.

როგორც „ფეისბუქის“ საკუთარ გვერდზე გავრცელებულ ვიდეოში სააკაშვილი აცხადებს, საქართველოს ყოფილმა პრემიერ მინისტრმა, ბიძინა ივანიშვილმა „კარგად მახსოვს, თავის დროზე პუტინის მითითებით, ჩემ წინააღმდეგ სისხლის სამართლის საქმეები როგორ აღძრა, რომ მე ქართულ პოლიტიკაში მონაწილეობა არ მიმეღო“.

მისივე თქმით, ივანიშვილის მსგავსად, უკრაინის პრეზიდენტმა, პეტრო პოროშენკომ „განკარგულება გამოსცა, უკრაინაში გზა დამიხურა და საქართველოში ექსტრადირებით მემუქრება“.

ყოფილი პრეზიდენტის განცხადებით, მიუხედავად იმისა, რომ პოროშენკო მას საქართველოში ექსტრადირებით ემუქრება, 10 სექტემბერს იგი პოლონეთის საზღვრიდან უკრაინაში მაინც შევა.

„10 სექტემბერს უკრაინაში დაბრუნება გადავწყვიტე - შეხვედრამდე უკრაინა-პოლონეთის საზღვარზე, - აცხადებს სააკაშვილი.

„უკრაინის სრული განადგურება მიმდინარეობს. ახმეტოვმა ხელში ჩაიგდო მსხვილი ენერგეტიკული სექტორი, რაც ნიშნავს, რომ უკვე შემოდგომიდან უკრაინელები მის და პოროშენკოს ჯიბეში უფრო მეტს გადაიხდიან ტარიფების სახით. ეროვნული ანტიკორუფციული ბიუროს დირექტორმა სიტნიკმა განაცხადა, რომ მისი ყველა საქმე დეპუტატების, პოროშენკოს გარემოცვის წინააღმდეგ დაბლოკილია უკრაინის სასამართლოებში. ამის ფონზე, შორიდან ვუყურო ყველაფერ ამას? არავითარ შემთხვევაში....მე დავპირდი უკრაინელ ხალხს, რომ მათ მხარეს ვიქნები. მე „ბარიგების“ მხარეს არ დავმდგარვარ, თუმცა ბევრჯერ შემოუთავაზებიათ ჩემთვის ეს. უკრაინელი პოლიტიკოსების ახალგაზრდა თაობასთან ერთად ჩვენ აუცილებლად შევცვლით ამ რეალობას. უკრაინა ევროპის ზესახელმწიფო გახდება. უკრაინელები ნორმალურად ცხოვრებას დაიწყებენ. შეუძლებელია იმის გაგრძელება, რაც ახლა ხდება“, აცხადებს სააკაშვილი და დასძენს: „მე თქვენი დიდი იმედი მაქვს. რა თქმა უნდა, ცალ-ცალკე ჩვენ გაგვანადგურებენ, მაგრამ თუ ერთად დავდგებით, ჩვენ ვერაფერს გვიზამენ“.