შეერთებული შტატების პრეზიდენტმა, დონალდ ტრამპმა პირობა დადო, რომ თუ საჭირო გახდება, მთავრობის მუშაობასაც შეაჩერებს იმისათვის, რომ მექსიკის საზღვრის გასწვრივ უკანონო იმიგრანტების ნაკადის შესაჩერებლად კედელი ააშენოს.

მან არიზონას შტატში, ფოენიქსში მის მხარდამჭერებს მიტინგზე - „გავხადოთ ამერიკა დიდებული ისევ!“ - უთხრა, რომ ოპოზიცია, „დემოკრატები“ „ობსტრუქციონისტები“ არიან.

80-წუთიან სიტყვაში მან მედიაც გააკრიტიკა და ბრალი დასდო მედიასაშუალებებს ულტრა-მემარჯვენე ჯგუფებისთვის „პლატფორმის“ მიცემისთვის, მაგრამ, როგორც BBC იუწყება, მან შარლოტსვილში ულტრა-მემარჯვენეთა მიერ მოწყობილ ძალადობაზე, რომელმაც ერთი ქალის სიცოცხლე იმსხვერპლა, მისი თავდაპირველი პასუხის ციტირება შერჩევით მოახდინა.

მან გამოტოვა მისი სადავო განცხადება, რომ ვირჯინიის ქალაქ შარლოტსვილში ძალადობისთვის პასუხისმგებლობა „ბევრმა მხარემ“ უნდა გაიზიაროს.

„ნაფტადან“ ჩრდილოეთ კორეამდე

მრავალმხრივ სიტყვაში ტრამპმა ასევე თქვა, რომ ის ფიქრობს, რომ „ალბათ დაასრულებს Nafta-ს“ - სავაჭრო შეთანხმებას შეერთებულ შტატებს, მექსიკასა და კანადას შორის, რომელსაც იგი არაერთხელ დაესხა თავს.

ამ ხელშეკრულებაში ჩართულმა სამმა ქვეყანამ შეთანხმების ცვლილებაზე მოლაპარაკებები დაიწყო და მხარეები 1-ელ სექტემბერს ისევ შეხვდებიან.

BBC წერს, რომ ჩრდილოეთ კორეაზე საუბრისას, პრეზიდენტი იმედიანი ჩანდა ფხენიანის სარაკეტო და ბირთვული გამოცდების გარშემო დაძაბულობის შემცირების შესაძლებლობით.

ჩრდილოეთ კორეის ლიდერის, კიმ ჩენ ინის შესახებ საუბრისას, ტრამპმა თქვა: „მე პატივს ვცემ იმ ფაქტს, რომ იგი იწყებს ჩვენს მიმართ პატივისცემას“.

„და შესაძლოა - შესაძლოა არა, მაგრამ შესაძლოა კი - რაღაც პოზიტიური შეიძლება გამოვიდეს“, დაამატა მან.

მაგრამ იმ დროს, როცა მის კომენტარებს მოწონების შეძახილებით ხვდებოდნენ საკონფერენციო ცენტრში, გარეთ შეკრებილ ტრამპის მოწინააღმდეგეებსა და პოლიციას შორის, მიტინგის დასრულების შემდეგ, შეხლა-შემოხლა მოხდა.

როგორც „როიტერსი“ იტყობინება, პროტესტანტების მიერ ბოთლებისა და ქვების სროლის შემდეგ, პოლიციამ ცრემლსადენი გაზი გაუშვა.