„უშიშროების საბჭო არანაირ კავშირში არ არის ამ სპეცოპერაციასთან. მოქმედ კონსტიტუციაში პირდაპირ წერია, რომ უშიშროების საბჭოს ფუნქცია არის თავდაცვისუნარიანობაზე ზრუნვა და ამ სფეროს მოწესრიგება“, ასე ეხმაურება პარლამენტის თავმჯდომარე პრეზიდენტ გიორგი მარგველაშვილის განცხადებას იმის შესახებ, რომ საქართველოში გლობალური რისკის მატარებელი საშიშროებისა და უშიშროების საბჭოს საჭიროების არ არსებობის შესახებ მიამიტურ განცდებს გაბრიელ სალოსის ქუჩაზე ჩატარებული სპეცოპერაციით პასუხი გაეცა.

პარლამენტის პრესსამსახურის ცნობით, ირაკლი კობახიძემ აღნიშნა, რომ ყველაფრით სპეკულირება არ შეიძლება, მით უმეტეს, პრეზიდენტის მხრიდან.

„სხვა სახელი ამას არ ჰქვია, რაც არის სამწუხარო. არანაირი კავშირი, არც მოქმედი კონსტიტუციის მიხედვით, არ აქვს უშიშროების საბჭოს სპეცოპერაციებთან, რომელიც დაკავშირებულია, მაგალითად, თუნდაც ტერორიზმთან, ან სხვა რაიმე ტიპის საფრთხესთან“, განაცხადა პარლამენტის თავმჯდომარემ.

მისივე თქმით, 1995 წლიდან, უშიშროების საბჭო ყოველთვის იყო პასუხისმგებელი თავდაცვისუნარიანობის ამაღლებაზე. ირაკლი კობახიძემ აღნიშნა, რომ საპარლამენტო სისტემაში უშიშროების საბჭო საფრთხეებისა და რისკების პრევენციის საკითხებით ვერ იქნება დაკავებული.

„ერთი წელი მუშაობს უშიშროების საბჭო. რა განიხილა უშიშროების საბჭომ ისეთი საკითხი, რომლითაც შეიძლებოდა ასეთი საფრთხეების პრევენცია. უშიშროების საბჭოს არც დღეს არ აქვს არანაირი კომპეტენცია, რომ ასეთი საკითხებით დაკავდეს და ვერც ექნება-ეს არის მთავარი. ვერ ექნება იმიტომ, რომ ჩვენ ვმუშაობთ საპარლამენტო სისტემაში.

საპარლამენტო სისტემაში უშიშროების საბჭო ვერ იქნება დაკავებული ისეთი საკითხებით, როგორიც არის მაგალითად, ასეთი რისკების პრევენცია. ეს უნდა ესმოდეს პრეზიდენტს.

შეიძლება, ესმის კიდეც. მე უკვე ეჭვი მეპარება ყველაფერში. უბრალოდ, ის მუდმივად სპეკულირებს ასეთი თემებით“, განაცხადა საქართველოს პარლამენტის თავმჯდომარემ.