საქართველოს პრეზიდენტი გიორგი მარგველაშვილი მიიჩნევს, რომ შეწყალების საკითხზე მის ინიციატივასთან დაკავშირებით მმართველი გუნდის წევრების გამოხმაურება და განცხადებები, რომ ახალი ინიციატივით პრეზიდენტმა წინასაარჩევნო კამპანია დაიწყო, „ქართული ოცნების" მიერ მის წინააღმდეგ „დაბნეული შავი პიარია".

ამ თემაზე პრეზიდენტმა ავლაბრის რეზიდენციაში საგანგებოდ გამართულ ბრიფინგზე ისაუბრა.

როგორ გიორგი მარგველაშვილმა განაცხადა, აღნიშნულ „დაბნეულ შავი პიარს" სერიოზულად არ აღიქვამს.

„ეს შეფასებები დაბნეულობის შთაბეჭდილებას ტოვებს, მე ვხედავ მთელ ტალღებს, არა მარტო შეწყალების კომისიასთან დაკავშირებით, ჩვენ ვნახეთ შავი პიარის ტალღა შეწყალებასთან დაკავშირებით, შავი პიარის ტალღა ე.წ. სააკაშვილთან გარიგების ნაწილში. ყოველ დღე ვხედავთ წარუმატებელი შავი პიარის ინიციატივებს, რომელიც, ჩემი აზრით, უკავშირდება იმ ფაქტს, რომ „ქართული ოცნების“ პოლიტიკური გუნდი, რომელიც ფაქტობრივად, 4 წლის განმავლობაში საპრეზიდენტო ინსტიტუტს ებრძოდა და ცდილობდა საპრეზიდენტო ინსტიტუტის დემონტაჟს. ამ პოლიტიკურ გუნდს ვერ ვხედავ, რომ ჰქონდეს ჩამოყალიბებული თავისი შეხედულება საპრეზიდენტო კანდიდატთან დაკავშირებით, ვერ ჩამოყალიბდნენ. ამავე ფონზე, ეტყობა, ჩამოყალიბდა პოზიცია, რომ შავი პიარი უნდა ვაწარმოოთ მოქმედი პრეზიდენტის წინააღმდეგ. და ყოველ დღე ჩვენ გვესმის ასეთი წარუმატებელი ტალღები.... მე სიმართლე გითხრათ, ამ დაბნეულ შავ პიარს სერიოზულად არ აღვიქვამ, არა მგონია, რომ ეს ვინმეზე მოქმედებდეს", განაცხადა გიორგი მარგველაშვილმა.