„ნაციონალური მოძრაობის“ ერთ-ერთი ლიდერი, საქართველოს საგარეო საქმეთა ყოფილი მინისტრი, გრიგოლ ვაშაძე ჟენევის კონსულტაციებზე რუსეთის მიერ გაჟღერებული ძალის გამოუყენებლობის შესახებ დეკლარაციის მიღებას დაუშვებლად მიიჩნევს და არჩილ ტატუნაშვილის ტრაგედიის ფონზე, რუსეთის ფედერაციასთან საუბარს „სრულ ამორალურობად“ აფასებს.

ვაშაძე ამტკიცებს, რომ საქართველოს დელეგაციამ რუსეთის მიმართ მთავარი მოთხოვნა მოხსნა, რაც ცალმხრივად ძალის გამოუყენებლობის საერთაშორისო ვალდებულების აღება იყო.

„რუსული პრესა რუსულ დიპლომატიურ წყაროებზე დაყრდნობით ავრცელებს ინფორმაციას, რომ ამ თვის ბოლოს დაგეგმილ ჟენევის კონსულტაციების რაუნდზე და შემდეგ ციტატა: საქართველო, აფხაზეთის რესპუბლიკა, სამხრეთ ოსეთის ე.წ. რესპუბლიკა, რუსეთის ფედერაცია, შეერთებული შტატები და ჟენევის კონსულტაციების თანათავმჯდომარეები მიიღებენ დეკლარაციას, რომელშიც ჟენევის კონსულტაციებში მონაწილე ყველა მხარე უარს იტყვის ერთმანეთთან ურთიერთობაში ძალის გამოყენებაზე. ამ დეკლარაციით, ჩვენ სამწუხაროდ, საქართველომ, საქართველოს დელეგაციამ მისცა რუსეთის ფედერაციას საშუალება, პროპაგანდისტულად გამოიყენოს ეს დეკლარაცია და სადაც საჭიროა ამტკიცოს, რომ მას აღარ სჭირდება უკვე ცალმხრივად საერთაშორისო ვალდებულების აღება ძალის არგამოყენების შესახებ და სადაც საჭირო არის, თავისთვის, რა თქმა უნდა, ამტკიცოს რომ ეს დეკლარაცია საერთაშორისო სამართლებრივი თვალსაზრისით სავალდებულო ხასიათს არ ატარებს. იმ ფონზე, როდესაც გიგა ოთხოზორიას და განსვენებული არჩილ ტატუნაშვილის, ვის ოჯახსაც პირადად მე და პარტია უსამძიმრებს, ვიზიარებთ ღრმა მწუხარებას ამ საშინელი ტრაგედიის გამო, ამ ფონზე რუსეთის ფედერაციასთან მსგავს დოკუმენტებზე საუბარი არის სრული ამორალურობა“, განაცხადა გრიგოლ ვაშაძემ.