„ქართული ოცნების“ დაპირება, სამართლიანობის აღდგენა არ მომხდარა, რამაც „ქუჩაში გადასულ სისხლიან გარჩევებამდე“ მიგვიყვანა, „ბიზნესმენთა მკვლელობები კი უფრო გახშირდება“, აცხადებს ექსპერტი გია ხუხაშვილი გაზეთ „კვირის პალიტრასთან“ საუბრისას.

მისი აზრით, ქვეყანა შევიდა „აბსოლუტურ სამართლებრივ ჩიხში, როდესაც არც პროკურატურა, არც სასამართლო და არც ფინანსური პოლიცია ნაბიჯსაც კი არ დგამენ“ სამართლიანობის აღსადგენად და ცხრა წლის განმავლობაში ფინანსურად დაზარალებული მოქალაქეებისთვის საკუთარი, წართმეული ქონების უკან დასაბრუნებლად. ამ პროცესების სამართლებრივი გზით წარმართვის გარანტორი კი იუსტიციის მინისტრი უნდა ყოფილიყო, თუმცა თეა წულუკიანი, როგორც ამას გია ხუხაშვილი მიიჩნევს, „აბსოლუტურად კომფორტულად გრძნობს თავს დამნაშავე მოსამართლეებთან თუ პროკურორებთან“.

„ქართული ოცნება“ ხელისუფლებაში სამართლიანობის აღდგენის დაპირებით მოვიდა, რაც, რა თქმა უნდა, გულისხმობდა, რომ ცხრა წლის განმავლობაში ფინანსურად დაზარალებულ მოქალაქეებს საკუთარი, წართმეული ქონება უნდა დაჰბრუნებოდათ. გავიდა წლები და აღმოვჩნდით აბსოლუტურ სამართლებრივ ჩიხში, როდესაც არც პროკურატურა, არც სასამართლო და არც ფინანსური პოლიცია ნაბიჯსაც კი არ დგამენ ამ მიმართულებით და მხოლოდ ფასადურ ინფორმაციას გვაწვდიან რამდენიმე დაზარალებულზე, რომ ვიღაცას თურმე ხუთი მანქანა დაუბრუნდა. ქუჩაში გადასულ სისხლიან გარჩევებამდე რომ მივიდოდით, ჯერ კიდევ მაშინ გახდა ცხადი, როდესაც 2012 წლის შემდეგ ხელისუფლებამ სისტემის დემონტაჟი კი არ დაიწყო, პირიქით, მას გაურიგდა - ხომ სასაცილოა იმაზე საუბარი, რომ პირადად მიშა მიდიოდა ბიზნესმენებთან ღამის სამ საათზე და თავად „ახევდა“ ქონებას? ამას აკეთებდნენ სისტემის სხვა რგოლები, პროკურორები თუ მოსამართლეები, რომლებსაც დღეს ხელისუფლებამ კიდევ მეტი კომფორტი შეუქმნა!“ აცხადებს გია ხუხაშვილი და განაგრძობს:

„ანუ, დღეს ვართ ვითარებაში, როდესაც თურმე ქონება უნდა დააბრუნოს მან, ვინც ეს ქონება თავის დროზე შანტაჟითა და ძალადობით ბიზნესმენს წაართვა. შესაბამისად, გაქრა ილუზია, რომ დაზარალებული ამ ქვეყანაში სამართლებრივად მოახერხებს წართმეულის დაბრუნებას. ამიტომაც გადავიდა პროცესი ქუჩაში. რა თქმა უნდა, დღეს „კოლექტიური მურუსიძე“ მართავს ქვეყანას, რომელიც საკუთარ თავს არ დაიჭერს. დღეს ხელისუფლებისთვის მისაღები ოპოზიცია გახდა „ევროპული საქართველო“, სადაც თავმოყრილია ის პოლიტიკური ელიტა, რომელსაც ჩამორთმეულ ქონებას უფორმებდნენ, ანუ, მიშა გავუშვით, სისტემა კი დავიტოვეთ, რომელიც დღეს ხელისუფლებას მართავს, მმართველი გუნდი მხოლოდ ფორმალურად გვყავს, სისტემა გახდა ურჩხული, რომელმაც მძევლად აიყვანა მისი მამა-მარჩენალი - ხელისუფლება. სწორედ ამიტომ გახშირდა მკვლელობებიც, ადამიანებს გაუქრათ სახელმწიფოებრიობის შეგრძნება და სამართლიანობის აღდგენის ერთადერთ გამოსავლად კრიმინალური ქმედებები მიაჩნიათ“, მიიჩნევს ექსპერტი, რომლის თქმითაც, „ერთ-ერთი მთავარი ფიგურანტი, ვინც ამ ვითარებაზეა პასუხისმგებელი, იუსტიციის სამინისტროა“.

„თეა წულუკიანი უნდა ყოფილიყო გარანტი იმისა, რომ როგორც პროკურატურაში, ისე სასამართლო სისტემაში პროცესები თუ საბოლოოდ არ გაჯანსაღდებოდა, ნაბიჯი მაინც გადაიდგმებოდა, მაგრამ რა? აბსოლუტურად კომფორტულად გრძნობს იუსტიციის მინისტრი თავს დამნაშავე მოსამართლეებთან თუ პროკურორებთან. პასუხისმგებლობა ეკისრება უზენაესი სასამართლოს თავმჯდომარე ნინო გვენეტაძესაც, რომელმაც, ფაქტობრივად, ვერ შეძლო სასამართლო სისტემაში არსებულ კლანებთან გამკლავება, პირიქით, ისიც სისტემის ნაწილად იქცა“, აცხადებს ხუხაშვილი და შეკითხვაზე - „თუ ეს პროცესი გაგრძელდა, დარჩა თუ არა ხელისუფლებას კრიმინალის გაკონტროლების რესურსი?“ - პასუხობს:

„მერწმუნეთ, ბიზნესმენთა მკვლელობები უფრო გახშირდება. სასამართლოები გადატვირთულია და მოსამართლეს სურვილიც რომ ჰქონდეს, საქმეზე სამართლიანი გადაწყვეტილება მიიღოს, ამისთვის, მინიმუმ, სამწლიანი ლოდინია საჭირო, რადგან უამრავი საქმე აქვს განსახილველი. პროკურატურა სავსეა შანტაჟისტებითა და დამნაშავე კადრებით. ასე რომ, ამის შეჩერება უკვე ძალიან რთულია. ქვეყანაში სამართლიანობის ილუზია რომ გაქრება, შემდეგ იწყება დიდი გაბრაზება, რაც ხშირად აფექტის მდგომარეობაში გადადის და უკვე სწორედ ამ სტადიაშია საზოგადოება - ეს კი უფრო თვალსაჩინო გახდება, როგორც კი არენაზე ალტერნატიული პოლიტიკური ძალა გამოჩნდება“.