გიორგი კვირიკაშვილი: ამერიკამ მხარი დაგვიჭირა მაშინ, როდესაც ეს ყველაზე მეტად გვჭირდებოდა
23-05-2018, 19:07

შრიფტის ზომა: [ A+ ] / [ A- ]

 

ისტორია ქართველთა მსოფლმხედველობის შემადგენელი ნაწილია. ჩვენ ძალიან ბევრი რამ გადავიტანეთ, რათა აქამდე მოვსულიყავით, და ამ ისტორიის გმირები სწორედ ქართველები არიან. 100 წლის წინ, მაისში საქართველომ უზარმაზარი ნაბიჯი გადადგა მომავლისკენ, აღნიშნული განცხადება პრემიერ მინისტრმა, გიორგი კვირიკაშვილმა აშშ-ის მშვიდობის ინსტიტუტში აშშ-საქართველოს სტრატეგიული პარტნიორობის კონფერენციაზე „პირველი რესპუბლიკის დაარსებიდან 100 წელი” სიტყვით გამოსვლისას გააკეთა.

 


„ჩვენ შევქმენით საქართველოს დემოკრატიული რესპუბლიკა მაშინ, როდესაც ჩვენი პატარა ქვეყნის გარშემო მძვინვარებდა მღელვარება, რევოლუცია და სამოქალაქო ომი, რომლებსაც ჩვენზე გაცილებით დიდი ძალები ასაზრდოებდა. იმ კონკრეტულ მომენტში ჩვენი წინაპრები შეიძლება ვერც აცნობიერებდნენ, რომ საქართველოს დამოუკიდებლობა და ჩვენი თავისუფლება კიდევ მეტი ხნით გადაიდებოდა, თითქმის 75 წლით. სულ რაღაც 3 წელიწადში მას შემდეგ, რაც ჩვენ დავიბრუნეთ სახელმწიფოებრიობა, წითელი არმია შემოიჭრა საქართველოში და მართალია, დროებით, მაგრამ მაინც წაგვართვა დამოუკიდებლობა.

 


მაგრამ ჩვენ არასდროს გვიღალატია ჩვენი დამოუკიდებლობისა და თავისუფლების ოცნებისთვის. ეს ინსტინქტები ჩვენს გენეტიკურ კოდშია გამჯდარი. აქ შეიძლება ვახსენოთ 1991 დაბრუნებული სახელმწიფო დამოუკიდებლობა, მაგრამ საქართველოს სახელმწიფოებრიობის გამოცდილების ფესვები ბევრად ადრე, საუკუნეებში უნდა ვეძებოთ. როგორც ცივილიზაციათა გზაჯვარედინი, ჩვენ ბევრს ვითვისებთ და ბევრს ვუზიარებთ ჩვენ გარშემო მყოფთ, მაგრამ, ამავე დროს, ვინარჩუნებთ ჩვენს ქართულ უნიკალურობას და დასავლურ უნიკალურობასაც. 100 წლის წინ საქართველომ სამუდამოდ დაუკავშირა თავისი გზა დასავლეთს. დღეს საქართველო აღარ არის გზაგასაყარზე. ჩვენი კულტურა ევროპულია ამერიკული ელფერით; ჩვენი მსოფლმხედველობა დასავლური და ტრანსატლანტიკურია ისევე, როგორც ჩვენი ღირებულებები და პოლიტიკა. ჩვენი ერთგულება დასავლური და ევროპული ღირებულებების საფუძვლებისადმი - დემოკრატიისა და ადამიანის უფლებათა დაცვისადმი მტკიცეა, ღრმა და მდგრადი. ჩვენ ვამაყობთ, რომ ვართ ტრანსატლანტიკური საზოგადოების პროდუქტიული წევრი ქვეყანა და დროთა განმავლობაში ჩვენ კიდევ უფრო დიდი ზრდა გველის", განაცხადა გიორგი კვირიკაშვილმა სიტყვით გამოსვლისას.

 


მისი თქმით, ამერიკის შეერთებული შტატები იყო ერთ-ერთი პირველი, ვინც აღიარა საქართველოს დამოუკიდებლობა 1991 წელს.

 

 

„ამერიკამ მხარი დაგვიჭირა მაშინ, როდესაც ეს ყველაზე მეტად გვჭირდებოდა - ჩვენი სახელმწიფოებრივი კონსოლიდაციის წინაშე მდგარი ყველაზე რთულ პერიოდებში.

 


დამოუკიდებლობის გამოცხადებიდან 27 წლის განმავლობაში საქართველოს არ ჰყოლია ისეთი დიდი მეგობარი, როგორიცაა აშშ-ი. ერთად ჩვენ შევქმენით ის, რასაც შეიძლება ვუწოდოთ „სტრატეგიული პარტნიორობა“ ამ სიტყვის სრული მნიშვნელობით.

 


ჩვენ სრული სერიოზულობით ვეკიდებით სტრატეგიული პარტნიორობის არსს. იგი არის სტრატეგიული, რადგანაც ამერიკელ მეგობრებთან ჩვენ გვაქვს ჩვენი რეგიონის და ერთიანი და თავისუფალი და მშვიდობიანი ევროპის ხედვა. იგი არის სტრატეგიული, რადგანაც ჩვენ შეგვიძლია შევხედოთ ერთსა და იმავე ფაქტს და შემდეგ გავუზიაროთ ერთმანეთს ჩვენი შეხედულებები ამ რეალობის მნიშვნელობის შესახებ, რათა შევიმუშაოთ სტრატეგიები საერთო მიზნების მისაღწევად. თითოეულ ჩვენგანს შემოაქვს ანალიტიკური ფილტრების წყება ჩვენს წინაშე მდგარ გამოწვევებთან გასამკლავებლად. ჩვენი თანამშრომლობის მიზანია სწორი სტრატეგიების შემუშავება საერთო მიზნების მისაღწევად.

 


ეს არის პარტნიორობა, რადგან გაზიარება ჩვენს შორის არ წყდება და ორმხრივად მიიმართება. ამერიკის შეერთებულმა შტატებმა მყისვე შეაფასა საქართველოს გეოსტრატეგიული მდებარეობის თანმდევი გამოწვევები, განსაკუთრებით დაძაბული ურთიერთობა რუსეთთან და მისი უსაფრთხოების ფართო გარემოს სირთულე. ამავე დროს, მან იმთავითვე გააცნობიერა საქართველოს ხელსაყრელი გეოგრაფია, მისი ძალა, ცხადყოს დემოკრატიული განვითარების უპირატესობები, ასევე სიცოცხლით სავსე ქართველების უკვდავი სულისკვეთება.

 


თავის მხრივ, საქართველო აცნობიერებს და წვლილი შეაქვს ამერიკის მხრიდან რეგიონში და მის ფარგლებს გარეთ თავისი ინტერესების და დემოკრატიული ღირებულებების განმტკიცებასა და დაცვაში. საქართველო დიდად აფასებს თავის წვლილს ამ პარტნიორობაში, იბრძვის რა ამერიკის და ნატოში მისი მოკავშირეების გვერდიგვერდ ისეთ ცხელ წერტილებში, როგორიცაა ერაყი და ავღანეთი, სადაც ამერიკის შეერთებული შტატების შემდეგ საქართველომ ნატოს სხვა ნებისმიერ წევრ ქვეყანაზე მეტი მებრძოლი დაკარგა ერთ სულ მოსახლეზე. საქართველოს ხარჯები თავდაცვაზე მნიშვნელოვნად აღემატება ნატოს სტანდარტს - 2%-ს, როგორც ამას პრეზიდენტი ტრამპი სამართლიანად ითხოვდა. ჩვენ ამით ვამაყობთ. ჩვენ ვამაყობთ, რომ მხარს ვუჭერთ ჩვენი საერთო უსაფრთხოების დღის წესრიგს. ერთად ჩვენ უფრო ძლიერნი ვართ, ვიდრე ცალ-ცალკე, რაც არის კიდეც სტრატეგიული პარტნიორობის არსი.

 


ევრაზიაში ტემპი იზრდება, რასაც ასაზრდოებს ისეთი ახალი სავაჭრო მარშრუტები, როგორიცაა ტრანსკასპიის დერეფანი და ახალი აბრეშუმის გზა. ახალი მოთამაშეები მთელი მსოფლიოდან დღეს ცდილობენ ევრაზიაში არსებული უზარმაზარი შესაძლებლობების გამოყენებას.

 


ევროპიდან აზიამდე იქმნება ახალი კავშირები და ალიანსები. საქართველოს უნიკალური მდებარეობისა და, შესაბამისად, აშშ-თან მისი სტრატეგიული პარტნიორობის მნიშვნელობას მხოლოდ ზრდა ელის წინ. სწორედ ახლაა დრო, ყურადღება მივაქციოთ ორმხრივ სავაჭრო შეთანხმებას, რომელიც ორივე სახელმწიფოს მოუტანს ეკონომიკურ და უსაფრთხოებასთან დაკავშირებულ სარგებელს. პარტნიორობა და სტრატეგია პირდაპირ კავშირშია მშვიდობასა და სტაბილურობასთან.

 


ამერიკასთან სტრატეგიული პარტნიორობა საქართველოსთვის დიდი პატივია. ჩვენთვის ძალიან სასიხარულოა, რომ ეს ყოველწლიური კონფერენცია გააძლიერებს და გააღრმავებს ჩვენს პარტნიორობას ყველას სასიკეთოდ", განაცხადა გიორგი კვირიკაშვილმა, როგორც ამას პრემიერ მინისტრის პრესსამსახური იუწყება.

 

კომენტარები: 0
კომენტარის დატოვება

თქვენი სახელი:*
თქვენი E-Mail:
  ქართულად წერა  
 

ძვირფასო მკითხველო! გამოხატეთ თქვენი აზრი აღნიშნული თემის გარშემო. გთხოვთ დაიცვათ კორექტულობა და პატივი სცეთ სხვების მოსაზრებებს.

მუქი დახრილი ხაზგასმული აღნიშნული | მარცხნივ განთავსება ცენტრში განთავსება მარჯვნივ განთავსება | სმაილების ჩასმა ლინკის ჩასმაფარული ლინკის ჩასმა Choice the color | ფარული ტექსტი ციტირების ჩასმა მონიშნული ტექტსი კირილიკურზე გადაყვანა. Insert spoiler

შეიყვანე კოდი: *

მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIANGE.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.

GUARDIAN.GE - ჩრდილოეთ კორეის ლიდერი კიმ ჩენ ინი სექტემბერში რუსეთში პრეზიდენტ ვლადიმერ პუტინთან შესახვედრად გამგზავრებას აპირებს, იტყობინება BBC-ის პარტნიორი CBS-ი ამერიკელ ოფიციალურ პირზე დაყრდნობით. ორი ლიდერი განიხილავს შესაძლებლობას, რომ ჩრდილოეთ კორეამ მოსკოვს იარაღი მიაწოდოს უკრაინაში ომის მხარდასაჭერად, განაცხადა ოფიციალურმა წარმომადგენელმა. დაგეგმილი შეხვედრის ზუსტი ადგილი უცნობია. წყაროებმა „The New York Times“-ს განუცხადეს, რომ კიმი, სავარაუდოდ, ბრონირებული მატარებლით გაემგზავრება.

ყველაზე კითხვადი
ბოლო სიახლეები
ამინდის პროგნოზი
ვალუტის კურსი