იუსტიციის მინისტრი თეა წულუკიანი მზადყოფნას გამოხატავს დატოვოს თანამდებობა, თუკი ამ გადაწყვეტილებას მმართველი პარტია მიიღებს. იგი დასძენს, რომ იმ არასამთავრობო ორგანიზაციებს, რომლებიც მის გადადგომას მოითხოვენ, ამის ლეგიტიმაცია არ გააჩნიათ.

აღნიშნულის შესახებ წულუკიანმა „იმედის კვირაში“ ისაუბრა.

„თუკი მმართველი პარტია მეტყვის, რომელიც არის მთავრობის, სალაპარაკო ენაზე რომ ვთქვათ, უფროსი, რომ მე უნდა წავიდე ჩემი თანამდებობიდან, რა თქმა მე არც ხვეწნა დამჭირდება და არც ბევრი ყიჟინი. მაგრამ, რამდენიმე არასამთავრობო ორგანიზაცია, რომელიც ცდილობს, რომ ქვეყანაში გატარდეს მხოლოდ ის რეფორმები, რომელიც მათ სურთ და ისე, როგორც მათ სურთ, რა თქმა უნდა, მათ არც ლეგიტიმაცია აქვთ რომ ჩემი გადადგომა მოითხოვონ“, განაცხადა თეა წულუკიანმა.

მან, ამ კონტექსტში, პოლიტიკური გეგმების შესახებაც გააკეთა აქცენტი და თქვა, რომ საპრეზიდენტო სკამისათვის „ბრძოლა დაწყებულია“ და მასში „უკვე პრეზიდენტიც ჩაერთო“.

„თუკი მათი გეგმა არის სხვა, რომ პოლიტიკურ პროცესში მიიღონ მონაწილეობა, რადგან საპრეზიდენტო სკამისთვის ბრძოლა დაიწყო და ამაში უკვე პრეზიდენტიც ჩაერთო, რომლის მთავარი ფუნქციაც არის, მანამ სანამ კანდიდატად არ განუცხადებია თავისი თავი, არის ერთადერთი და უზენაესი, ხელი შეუწყოს სახელმწიფო სტრუქტურების, მათ შორის ჩემის, ნორმალურ ფუნქციონირებას, წინააღმდეგ შემთხვევაში, საქმე გვაქვს უკვე პოლიტიკურ პროცესთან და მე არ მგონია, რომ ამ პოლიტიკურ ბრძოლაში მმართველი პარტია ან ჯაბანის პოზიციით გამოვა ან დამარცხებული, პირიქით“, განაცხადა თეა წულუკიანმა.

მინისტრმა აღნიშნა, რომ ხორავას ქუჩაზე მომხდარ მკვლელობას პოლიტიკური ძალების ნაწილი საკუთარი მიზნებისთვის იყენებს და მოზარდების მკვლელობის გირგვლიანის მკვლელობასთან შედარების მცდელობა მიუღებელია.

„ზოგიერთი პოლიტკური ძალა იყენებს ამ უბედურებას, რაც მოხდა ხორავას ქუჩაზე, ბავშვთა შორის მკვლელობა, საკუთარი მიზნებისათვის. ეს არის პოლიტიკური ტრაგედიაც ჩვენი ქვეყნის, რადგან თავიდან შეეცადნენ ეს საქმე შეედარებინათ გირგვლიანისთვის, მაგრამ არ გამოვიდა, იმიტომ რომ გირგვლიანი მოკლა სახელმწიფომ, მთავრობის მაღალჩინოსნებმა - ხორავას ქუჩის ტრაგედიაში მონაწილეობდნენ მხოლოდ ბავშვები“, აღნიშნა იუსტიციის მინისტრმა.