რომან გოცირიძისთვის არადამაჯერებელი და გაუგებარია ირაკლი კობახიძის მიერ პარლამენტის ბიუროს სხდომაზე გაკეთებული განმარტება ნიკა მელიას დაკავებასთან დაკავშირებით, რომ დეპუტატი კი არ დააკავეს, არამედ მისი განრიდება მოხდა, რათა „ეს ქმედება არ გადაზრდილიყო რაიმე სხვა ტიპის სამართალდარღვევაში“.

„ნაციონალური მოძრაობის“ დეპუტატმა პარლამენტის თავმჯდომარეს უთხრა, რომ შინაგან საქმეთა მინისტრი მასთან იმიტომ მივიდა, რომ „ამ სიტუაციიდან გამომძვრალიყვნენ“.

„ჩვენ ვხედავთ, რომ მოხდა სერიოზული დანაშაული. ხდება იურიდიული ტერმინებით მანიპულაცია და როგორც უკვე აქ ითქვა, არავითარი განრიდება არ არსებობს დეპუტატთან მიმართებაში. გაიტაცეს დეპუტატი და მაშინ თქვენ ამბობთ, რომ ეს განრიდება შეიძლება იყოს 24 საათის განმავლობაში? არ შეიყვანონ, ე.ი. პოლიციის შენობაში და მანქანაში განრიდებული ჰყავდეთ? ვინ დაადგინა განრიდების ასე ვთქვათ, დროის საზღვარი - 10 წუთია განრიდება, თუ 10 საათი. რატომ იყო აქ მოსული თქვენთან შინაგან საქმეთა მინისტრი? იმიტომ, რომ ამ სიტუაციიდან გამომძვრალიყავით და არაფორმალური კონსულტაციების შედეგად და როგორც ამბობთ, თქვენი ჩარევის შედეგად, ფაქტობრივად, თქვენ მიაფუჩეჩეთ კანონდარღვევის ფაქტი“, განაცხადა რომან გოცირიძემ.

ირაკლი კობახიძემ ბიუროზე განაცხადა, რომ პოლიციამ კარავში მყოფი ორი ძებნილის აყვანის ოპერაცია ჩაატარა.

„გავრცელდა ინფორმაცია შინაგან საქმეთა სამინისტროდან, კონკრეტულად ამ კარვებიდან აყვანილი იქნა ორი ძებნილი, რომელსაც უკვე დიდი ხანია ეძებს შინაგან საქმეთა სამინისტრო“, განაცხადა კობახიძემ, რაზეც მას გოცირიძემ ასე უპასუხა:

„ჩვენ ვიცოდით, რომ თქვენ ნარკოტიკებს უდებდით. ახლა ორი ძებნილი ჩაუდეთ იმ კარავში ხომ? ე.ი. თქვენ ნარკოტიკების ჩადების პრაქტიკიდან გადახვედით ძებნილების ჩადების პრაქტიკაზე“.