პოლიციის მიერ დაკავებული და მოგვიანებით განთავისუფლებული ნიკა მელია დღევანდელ მოვლენებთან დაკავშირებით უმთავრეს პასუხისმგებლობას შინაგან საქმეთა მინისტრს, გიორგი გახარიას აკისრებს და აცხადებს, რომ იგი „აუცილებლად აგებს პასუხს“.

პატიმრობიდან განთავისუფლების შემდეგ „ერთიანი ნაციონალური მოძრაობის“ პოლიტიკური საბჭოს თავმჯდომარემ, დეპუტატმა მელიამ კომენტარი „რუსთავი 2“-თან გააკეთა.

„აღმოაჩინეს დაკავებიდან 1 საათში... კითხვაზე, ვიყავი თუ არა პარლამენტის წევრი და პასუხი, რომ ‘დიახ’, ვითომ ნუთუ არ იცით, რომ ვარ? და დაუყოვნებლივ მომხსნეს ხელბორკილები და გამოვედი, გავაჩერე ტაქსი და მოვედი აქ... და გამოსულა ვიღაც ქალბატონი, „ქართული ოცნების“ დეპუტატი, ჩემი კოლეგა და უსაუბრია, რომ თითქოს ეს იყო განრიდება ბატონი მელიასიო. როგორც აი, რუსთაველის თეატრში, როდესაც გარდაიცვლება ამაგდარი მსახიობი და გამოასვენებენ იქიდან, ხელში ამიყვანა ოცდაათმა კაცმა და მანქანაში ჩამტენა.

„დააკავეს ადამიანები, ვინც სარალიძეს და ბატონ მაჩალიკაშვილს გვერდში, მხარში ედგა დღეების განმავლობაში და მკვლელები ახლა შესაძლებელია, მე მისმენდნენ. შესაძლებელია კი არა, მისმენენ ალბათ, და მკვლელების მფარველები - ყველა, ბატონი გახარია არის ყველაზე მძიმეწონიანი დამნაშავე ამ დღევანდელ მოვლენებთან დაკავშირებით. ეს ადამიანი აუცილებლად აგებს პასუხს“, აღნიშნა მელიამ.