ზაზა სარალიძის გადაწყვეტილებით, თბილისში, პარლამენტის შენობასთან აქციები „დროებით შეწყდება“, თუმცა საჭიროების შემთხვევაში მასშტაბური აქციის გამართვა ძალაში რჩება. იგი შინაგან საქმეთა და იუსტიციის მინისტრებს ერთკვირიან, „გონივრულ ვადას“ აძლევს იმისათვის, რომ პოსტებიდან გადადგნენ.

„მოთხოვნები იგივე რჩება აბსოლუტურად. პლუს გონივრული ვადა მინდა მივცე ხელისუფლებას იქიდან გამომდინარე, რომ მოვითხოვე შინაგან საქმეთა და იუსტიციის მინისტრების გადაყენება. გონივრულ დროსაც მივცემ ერთი კვირის განმავლობაში, რომ იფიქრონ. ეს სოლიდარობის აქციები გაგრძელდება, რა თქმა უნდა. თუ ჩავთვლით საჭიროდ, არ არის გამორიცხული, ხვალვე ჩავნიშნოთ მასშტაბური აქცია. როგორც ასეთი, კატეგორიულად ერთ კვირას გადავწევ აქციას, ამას არ ვამბობ... რაც არ უნდა გამოიძიოს შინაგან საქმეთა სამინისტრომ, დღეს ყველამ თვალნათლივ დავინახეთ, რა გადაცდომები ჰქონდა შინაგან საქმეთა სამინისტროს“, განაცხადა ზაზა სარალიძემ ჟურნალისტებათან საუბრისას.

მან აღნიშნა, რომ აქციებს არ ეთიშება, მაგრამ დატვირთული გრაფიკიდან გამომდინარე, ვერ მოახერხებს აქციებზე ყოფნას.

„გამოთიშვა გამორიცხულია. უბრალოდ, განვმარტავ ისევ. დღეს აქცია დაგეგმილი მქონდა, მაგრამ იქიდან გამომდიონარე რომ მთელი დღე სასამართლოში ვიყავი, შემდეგ ამ კომისიასთან ვიყავი შესახვედრი და დღეს კიდევ უნდა წავსულიყავი გენინსპექციაში, მაგრამ უკვე გვიანია ძალიან, ვეღარ მივდივარ. ხვალ დილიდან გენინსპექციაში უკვე შეხვედრაზე შევთანხმდით, 11:00 საათზე გენინსპექციაში უნდა ვიყო. უბრალოდ ვერ მივაქცევ ყურადღებას. ნებისმიერ ადამიანს თუ უნდა საპროტესტო აქცია რომ გაგრძელდეს, აუცილებლად გააგრძელებენ და მოთხოვნები აბსოლუტურად იგივე რჩება“, აღნიშნა სარალიძემ.

შეკითხვაზე, თუ რა მოსაზრება აქვს ამასთან დაკავშირებით მალხაზ მაჩალიკაშვილს, სარალიძემ თქვა, რომ მასთან დილის შემდეგ არ ჰქონია კომუნიკაცია, მაგრამ დასძინა, რომ მალხაზ მაჩალიკაშვილი და სხვები პანკისის ხეობაში რამადანს აღნიშავენ, რაც კვირის ბოლოს სრულდება და ამის შემდეგ ისინი „მაქსიმალურად შემოგვიერთდებიან“.